Хайрын дуугаар хослон, рок попын ертөнц дэх дуэт дуучдын орон зайг эзлэх болсон дуучин О.Анхбаяр, Б.Халиун нар уран бүтээлийн олз омог ихтэй явна. "Хайр өөрөө гайхалтай" хэмээх анхны бие даасан цомгоо тоглолт болгож амжсан дуэт дуучид маань сүүлийн үед стиль имижээ эрс өөрчлөөд буй.

Телевизийн олон ангит киноны дууг өөрийнхөөрөө амьдруулах болсон тэд эдгээр бүтээлээрээ шинэ цомог гаргах санаатай ажиллаж эхэлсэн сурагтай. Уг ажлынхаа хүрээнд саяхан Солонгос улсыг зорьж, нэлээдгүй зүйл амжуулаад ирсэн гэнэ.

Солонгосын уран бүтээлчдийн ажиллах арга барил, клипний зохиомж болон бусад зүйлийн тухайд багагүй туршлага хуримтлуулсан дуучин хос эх орондоо ирээд олон ажил төлөвлөөд байгаа юм байна. Энэ ч утгаараа, тэд уран бүтээл болоод ажил амьдралынхаа тухай дэлгэрэнгүй мэдээллийг багтаасан вэб хуудас хүртэл нээсэн аж.

Уг хуудсанд дуучин О.Анхбаяр, Б.Халиун нарын тун удахгүй гаргах "Сувдан хайр" нэртэй хоёр дахь бие даасан цомгийн тухай мэдээлэл ч багтсан байна. Киноны шилдэг дуунаас бүрдсэн энэхүү цомгийн бүтээлүүд хайрын сэдэвтэй учраас ийнхүү "Сувдан хайр" хэмээн нэрийдсэн гэнэ лээ. Дуэт дуучид хоёр дахь цомгоо гаргасны дараа тоглолтоо хийх тухай сонирхуулсан шүү.