Монголбанк банк байгуулах зөвшөөрөл олгох, хөрөнгө, төлбөрийн чадварыг хангуулах болон үйл ажиллагааг нь зохицуулахтай холбогдсон дүрэм, журам шийдвэр гаргаж, хэрэгжилтэд нь хяналт тавьдаг. Мөн зөвшөөрлийг хүчингүй болгох, хязгаарлалт, хяналт хийх, банкинд албадлагын арга хэмжээ авах үйл ажиллагааг явуулах эрхтэй.

Хөгжлийн банкны нийт зээлийн багцын 50 гаруй хувь нь чанаргүй ангилалтай болсон. Тус банкны үйл ажиллагаанд хийж ирсэн хяналт, шалгалтын талаар Монголбанкны Ерөнхийлөгч Б.Лхагвасүрэнгээс тодруулахад "Хөгжлийн банкны үйл ажилагаа 2011 оноос эхэлсэн. Гэвч Монголбанкны хяналтад  2017 онд орсон. Үүнээс өмнө тухайн банкны үйл ажиллагааг төрөөс хянадаг байсан юм.

Монголбанк 2018 онд, хамгийн сүүлд 2021 онд Хөгжлийн банканд шалгалт хийсэн. Сүүлийн шалгалтын тайлангаар тус банкны нийт зээлийн багцын 50 хувь нь буюу  1.7 их наяд төгрөгтэй тэнцэх хэмжээний зээл "муу" гэж ангилагдсан. Улмаар тус банкны санхүүгийн тайланд төвөгтэй нөхцөл үүссэн.

Хөгжлийн банкны 2023 онд эхэнд төлөх ёстой 800 сая ам.доллартой тэнцэх хэмжээний өр, төлбөр бий. Үүнийг төлөх эх үүсвэрээ бүрдүүлсэн байх хэрэгтэй, эсвэл дахин санхүүжилт, бүтцийн өөрчлөлт хийгээд сунгаад явна. Санхүүгийн тайлан сайн харагдаж байж сунгалтын асуудал яригдах учиртай. Энэ утгаараа өнөөдөр төвөгтэй байдал үүссэн байна гэж харж байгаа.

Хөгжлийн банкнаас олгосон 1.7 их наядын бүх зээл төлөгдөөд ороод ирвэл өрөө төлөхөд асуудал үүсэхгүй. Энэ мөнгийг зээл болгон гаргахаас илүү хадгалаад өр төлбөрөө хаах нь чухал. Зээлийн эргэн төлөлтийн мөнгийг Монголбанканд түр данс нээж, 2023 онд төлөх өрийг төвлөрүүлэхээр ярилцаж байна. Төв банкнаас үүнийг дэмжиж байгаа. Сангийн яам, Засгийн газраас хүсэлт өгвөл түр данс нээх боломжтой" гэж ярилаа.

Хөгжлийн банканд өнөөдрийн байдлаар нэг их наяд төгрөгийн хөрөнгө бий аж.