Өвөрхангайчууд өнгөрөгч бямба гараг /2015.11.14/-т аймаг, цэргийн арслан цолтнуудадаа хүндэтгэл үзүүлэх дөрөвдүгээр чуулга уулзалт, наадмыг зохион байгууллаа. Тус аймгийн Үндэсний бөхийн холбоо дөрөв дэх жилдээ энэ чуулга уулзалтыг зохион байгуулж байгаа юм.
        
Холбооны тэргүүн н.Хүрэлбаатар наадмыг нээж хэлсэн үгэндээ “Чуулга уулзалтаараа бид аймгаас төрөн гарсан арслангуудадаа хүндэтгэл үзүүлэх, тэднийг алдаршуулах, мөн энэ спортоор хичээллэж байгаа залуу үедээ сургамж, үлгэр дуурайлал, урам зориг өгөхийг зорьдог. Өвөрхангай нутгаас улсын цолтой олон бөх төрүүлэх нь бидний зорилго” гэдгийг онцолсон.

Чуулга уулзалтад аймгийн арслан, ахмад бөх Д.Аюушжав, Ц.Донтор Ц.Цэдэндамбаа, Н.Баатар, С.Доржваанчиг, Г.Дашцэрэн, Н.Пүрэвдорж, цэргийн арслан Д.Цэрэндоржы тэргүүтэй ахмад бөхчүүд болон залуу арслангууд хүрэлцэн ирсэн. Одоогоор аймгийн хурц арслан Д.Цэрэнсодном, аймгийн арслан Б.Дэлгэрсайхан, цэргийн арслан Л.Батзориг тэргүүтэй арав гаруй залуу хүчтэн ид барилдаж байгаа аж.

Өвөрхангай аймгийн Бөхийн холбооны дэд дарга, УИХ дахь Ардчилсан намын бүлгийн Ажлын албан дарга С.Дэмчиг 40-өөс дээш настай ахмад бөхчүүдэд гарын бэлэг гардуулж, хүндэтгэл  илэрхийлэв.