УИХ-ын өнөөдрийн чуулганаар гишүүд Ерөнхий сайдаас асуулт асууж, хариулт авлаа.

Энэ үеэр УИХ-ын гишүүн О.Цогтгэрэл "Зорилго нь аргаа зөвтгөдөг гэж ярьдаг. Үр дүнд хүрч л байвал ямар аргаар хэдэн хүн хэлмэгдүүлж, яаж хүрэх нь хамаагүй гэдэг танай намын коммунист угшил том төслүүд дээр гарч ирж байна. 

Туулын хурдны замыг бүтээн байгуулалтын хувьд эсэргүүцэж байгаа хүмүүс хэр олон байгааг сайн мэдэхгүй. Агуулгын хувьд түгжрэл бууруулах гэж байхад хэдэн төгрөгөөр босгож байгаа, тэр бургас, ТЭЗҮ, ил тод байгаа эсэх нь хэнд хамаатай юм гэдэг хандлагаар хандаж байна. 

Анхнаас нь ил тод нээлттэй зарлаад, шалгарсан компанийн танилцуулгыг хийж, байгаль орчны эерэг сөрөг нөлөөг танилцуулаад явбал зүгээр байх. Харбины гэрээ ч гэсэн тэр, хил холбож л байвал цаад хулгай хэнд хамаатай юм бэ гэж байгаа юм шиг" гэв. 

Үүний хариуд Ерөнхий сайд Н.Учрал "Би авлигын асуудал дээр О.Цогтгэрэл даргатай улс төр хийхгүй. Танайд ч манайд ч авлигыг өөгшүүлсэн нөхөд байна. 

Би унаж босоод, үхэл амьдралын заагаас ирсэн хүн. Надад элдэв шунал тачаал байхгүй. Би элдэв кино драма үзүүлэхгүй. Ажлаараа үр дүнгээ харуулна. Ардчилсан Намыг засагт хамтраагүй ч авлигын эсрэг тэмцэлд хамтаръя гэж уриалж байна. 

Би төсөл гацаагч биш төслийг гарцыг гаргаж ирсэн. Орано майнингтай хийх хэлэлцээрийг орчин үеийн боловсролтой залуучуудыг урьж, ирээдүйд ямар ч өр төлбөр ногдохгүй олон улсын гэрээ хийсэн хүн. 

Хууль хяналтын байгууллага эцсийн цэгийг хатгатал би Туулын хурдны замын төслийг зогсоолоо гэж хэлсэн. Энд ямар нэг авлига, ашиг сонирхол байгаа эсэхийг тогтоох ёстой. Иргэдийн дунд байгаа эргэлзээ тээнэгэлзлийг арилгахын тулд олон нийтийн хэлэлцүүлэг хийх хэрэгтэй. Түүнээс биш би хөгжлийн том төслүүдээ дэмжинэ. Нэг юанийн эргэлзээгүй болгож байж төслийг үргэлжлүүлнэ. Туулын хөвөөнд өссөн хүүхдийн хувьд би Туулын хурдны замын төсөл дээр хатуу байр суурьтай байна" гэв.