Цахим орчинд “Мэргэлнэ, засал хийнэ” гэсэн үйлдлийн аргаар иргэдийн сүсэг бишрэлийг далимдуулан бусдад 2.5 тэрбум төгрөгийн хохирол учруулж, залилах гэмт хэрэг үйлдсэн этгээдийг Цагдаагийн байгууллагынхан олж тогтоон 2026 оны 4-р сарын 7-ны өдөр баривчилжээ. 

Уг этгээд нь засал номын зан үйлд ашиглана гэж алтан гинж, бөгжийг нь авах, их хэмжээний мөнгө авах, "үйл хийнэ" хэмээн өндөр төлбөр авч алга болох зэргээр бусдад хохирол учруулдаг байжээ. 

Иргэн Б нь орон нутгаас холбогдож, 72 сая төгрөг шилжүүлж залилуулсан байна. Зүс таних иргэн Г нь олон дагагч цахим хуудастай, зөн билигтэй мэргэлдэг гэдэгт нь найдаж 9 сая төгрөг шилжүүлжээ. Цагдаагийн байгууллагаас тухайн этгээдтэй холбоотой үйлдлийг үргэлжлүүлэн шалгаж байна. 

Цагдаагийн байгууллагаас 2026 оны эхний гурван сарын байдлаар залилах гэмт хэргийн улмаас учирсан 21.7 тэрбум төгрөгийг нөхөн төлүүлжээ. Залилах гэмт хэргийн 85 хувь нь цахим орчинд үйлдэгдэж байна. Иймд иргэд та бүхэн цахимд нийтлэгдэж буй зар мэдээнд хянамгай хандаж, хувийн мэдээллээ өгөхгүй, урьдчилгаа төлбөр шилжүүлэхгүй байхыг Цагдаагийн байгууллагаас сэрэмжлүүлэв.