Дэлхий даяар хүн амын хөгшрөлт, эрүүл мэндийн салбарын ажилтнуудын хомсдол зэрэг сорилтуудтай тулгарч байгаа тул эрүүл мэндийн салбарт дижитал шилжилт зайлшгүй шаардлагатай байна. Тайвань орон “дижитал тусламж үйлчилгээ” буюу “Data-Driven Digital Care”-г гол цөм болгон “Эрүүл Тайвань” төслийг хэрэгжүүлж байна.

Өөрөөр хэлбэл их хэмжээний өгөгдөл, хиймэл оюун ухаан (AI) болон үүлэн технологийг хослуулан эмнэлгийн тусламж үйлчилгээний чанар, үр ашгийг сайжруулж, “цогц тусламж үйлчилгээ”-нд төвлөрсөн эмнэлгийн шинэ загвар руу шилжиж байна.

Тайвань мэдээллийн технологийн салбар болон үндэсний эрүүл мэндийн даатгалын системийг амжилттай хөгжүүлсэн давуу талтай бөгөөд урт хугацааны турш өндөр чанартай эмнэлгийн өгөгдлийг хуримтлуулж, ухаалаг эрүүл мэндийн тусламж үйлчилгээний бат бөх суурийг бий болгосон.

Тайваньчууд дижитал эрүүл мэндийн цогц дэд бүтцийг бий болгохын тулд гурван томоохон орон зай, гурван томоохон стандарт, гурван хиймэл оюун ухааны төвийг нэгтгэсэн үндэсний түвшний дижитал эрүүл мэндийн платформ болох “333 архитектур” буюу “National Digital Healthcare Platform 333 Architecture”-ыг санал болгож байна.

“333 архитектур” платформын хүрээнд Тайвань даяар 400 гаруй эмнэлгийн цахим эмнэлгийн бүртгэлийг нэгтгэж, эмнэлэг хооронд өгөгдөл харилцан солилцох чадварыг хангахын тулд FHIR зэрэг олон улсын стандартыг нэвтрүүлж, “Zero Trust” аюулгүй байдлын платформын дагуу эмнэлгийн өгөгдлийн аюулгүй урсгал, үр дүнтэй хэрэглээг ханган ажиллаж байна.

Тус бодлогыг хэрэгжүүлсний дараахан үр дүн аажмаар гарч эхэлсэн. Архаг өвчний менежментийн чиглэлээр “Өрхийн эмчийн платформ” нь эмч нарт хувь хүнд тохирсон тусламж үйлчилгээ үзүүлэхэд нь дэмжлэг үзүүлэх зорилгоор хиймэл оюун ухааны эрсдэлийн урьдчилсан таамаглалыг нэгтгэж, эрүүл мэндийн тусламж үйлчилгээг идэвхгүй оношилгоо, эмчилгээнээс урьдчилан сэргийлэх эрүүл мэндийн менежмент рүү шилжүүлж байна.

Эмнэлгийн мэдээллийн интеграцийн хувьд MediCloud систем нь бодит цагийн эмнэлгийн болон эмийн мэдээллийг өгч, үзлэгийн үр дүнг зураг дүрслэлээр баталгаажуулах, эмнэлгийн дүрс зураглалыг ухаалаг эрүүл мэндийн технологийн тусламжтайгаар уншиж онош тавьж, эмнэлгийн тусламж үйлчилгээний чанар болон өвчтөний аюулгүй байдлыг сайжруулсаар байна.

Хувь хүний эрүүл мэндийн менежментийн салбарт “эрүүл мэндийн хадгаламжийн данс”-ны нэвтрэлтийн түвшин 50%-иас давсан бөгөөд олон нийтийн дунд эрүүл мэндийн урьдчилан сэргийлэх менежментийг дэмжих зорилгоор тэдгээрийг зүүж болох төхөөрөмжийн мэдээлэлтэй холбож болно. Хорт хавдрын эмчилгээг дижиталчлахтай холбоотойгоор FHIR стандартаар дамжуулан дараагийн үеийн дарааллын (NGS) өгөгдлийг солилцох нь ноцтой өвчин, гэмтлийн хяналт, эмийн хэрэглээний үйл явцыг хяналтыг хурдасгаж, эмчилгээний хүртээмжийг сайжруулсан.

Цаашилбал виртуал эрүүл мэндийн даатгалын карт, цахим жор, телемедицин үйлчилгээг сурталчлах нь цаг хугацаа, орон зайн хязгаарлалтыг үр дүнтэй даван туулж, хөдөө орон нутаг болон гэртээ тусламж үйлчилгээ авах боломжийг нэмэгдүүлсэн.

Эрүүл мэндийн салбарт хиймэл оюун ухааныг хөгжүүлэх цогц засаглалын тогтолцоог бий болгосон. Тайваньчууд судалгаа, хөгжүүлэлтээс эхлээд хэрэглээ хүртэл хиймэл оюун ухааны аюулгүй байдал, найдвартай байдлыг хангахын тулд хариуцлагатай засаглал, клиник баталгаажуулалт, нөлөөллийн үнэлгээг хамарсан үндэсний хэмжээний 19 эмнэлгийн хиймэл оюун ухааны төвийг байгуулсан.

Одоогийн байдлаар хорт хавдрын эрт илрүүлэг, зүрхний үйл ажиллагаа хянахад дэмжлэг үзүүлэх болон клиник шийдвэр гаргахад дэмжлэг үзүүлэх 50 гаруй эмнэлгийн хиймэл оюун ухааны бүтээгдэхүүнийг баталж, хэрэглээнд нэвтрүүлсэн. Тайваний 13 эмнэлэг 2026 онд “Newsweek” сэтгүүлээс нэрлэсэн дэлхийн шилдэг ухаалаг эмнэлгээр шалгарч, уг үзүүлэлтээр Ази тивд хоёрдугаарт жагсаж, олон улсад өрсөлдөх чадвараа харууллаа. Үүнээс гадна Тайвань хувийн нууцад хамаарах мэдээлэл өгөгдлийг шилжүүлэхгүйгээр байгууллага хоорондын болон хил дамнасан хиймэл оюун ухааны загварын баталгаажуулалтыг хийх холбооны сургалтын платформыг хөгжүүлж байгаа бөгөөд Зүүн Өмнөд Азийн түншүүдтэйгээ хамтран олон улсын мэдээллийн хамтын ажиллагааны найдвартай загварыг бий болгосон.

Өвчин эмгэгт хил хязгаар гэж үгүй бөгөөд дэлхийн эрүүл мэндийн засаглал нь цогц хамтын ажиллагааг шаарддаг. Тайвань өгөгдөлд суурилсан, харилцан ажиллах боломжтой стандарттай, хиймэл оюун ухаанаар дэмжигдсэн ухаалаг эрүүл мэндийн экосистемийг бий болгож, эмнэлгээс орон нутаг, өдөр тутмын амьдралд эрүүл мэндийн үйлчилгээг өргөжүүлж, цогц тусламж үйлчилгээг нэвтрүүлж чадсан. Тайваний практик туршлага нь бид олон улсын нийгэмлэгт хувь нэмэр оруулах чадвартай гэдгийг нотлон харуулж байна.

Гэсэн хэдий ч Тайвань эрүүл мэнд, анагаах ухаанаас бусад хүчин зүйлс, шалтгааны нөлөөллийн улмаас дэлхий дахины эрүүл мэндийн салбарын үйл хэрэгт бүрэн хувь нэмэр оруулахад саад учирсаар байна. Бид Дэлхийн Эрүүл Мэндийн Байгууллага (ДЭМБ) болон холбогдох оролцогч талуудыг Тайванийг дэлхийн эрүүл мэндийн тогтолцоонд нэгдэн оруулахыг дэмжиж, дэлхийн эрүүл мэндийн тогтолцооны бүрэн бүтэн, уян хатан байдлыг сайжруулахыг чин сэтгэлээсээ уриалж байна.

Тайвань дижитал инновацаар дамжуулан ухаалаг эрүүл мэндийн салбарын хөгжлийг гүнзгийрүүлэн хөгжүүлж, дэлхийн эрүүл мэнд, сайн сайхан байдалд хувь нэмэр оруулж, ДЭМБ-ын дүрэмд заасан “Эрүүл мэнд бол хүний суурь эрх юм” болон НҮБ-ын Тогтвортой хөгжлийн зорилт болох “Хэнийг ч орхигдуулахгүй байх” зарчмыг хамтран хэрэгжүүлэх болно.