Гольфийн өсвөрийн улсын аварга шалгаруулах нээлттэй анхдугаар тэмцээнийг Монголын гольфийн холбоо  Sky resort  цогцолборын Mount Bogd гольфийн талбайд амжилттай зохион байгуулав. 

Тэмцээн 6-9 нас, 10-12 нас, 13-16 насны 3 ангилалд болсон бөгөөд нийт 6-16 насны 34 тамирчид өрсөлдсөн юм.

6-9 насны ангилалын тэмцээн 4 нүхэнд өрсөлдөж Г.Эрмүүн 19 оноогоор өсвөрийн гольфийн аварга болж удаах байранд 20 оноогоор Э.Тэнүүн,  23 оноогоор н.Төрхишиг нар тус тус шалгарлаа.

Longest төрөлд Г.Бат-Очир, Nearest төрөлд Э.Тэнүүн нар ялагчаар тодорлоо.

10-12 насны ангилалын тэмцээнд зургаан нүхэнд үргэлжилж Ф.Амина 33 оноогоор түрүүлж 36 оноогоор н.Тэлмэн, 39 оноогоор н.Мэргэн, Н.Хүслэн нар оноо тэнцэв.  Longest төрөлд Б.Эрдэнэчимэг, Nearest төрөлд Н.Хүслэн нар ялагчаар тодорлоо.

Ахлах нас буюу 13-16 насны ангилалын тэмцээн 9 нүхэнд үргэлжилж Ө.Төгөлдөр 38 оноогоор Монгол Улсын өсвөрийн гольфийн аварга боллоо. 43 оноогоор М.Буян-Эрдэнэ, 47 оноогоор Б.Төгөлдөр нар удаалж Longest болон Nearest-ын шагналын ялагчаар Ө.Төгөлдөр ганцаараа шалгарлаа.

Энэ тэмцээний үеэр гарсан хамгийн ховор бөгөөд хамгийн гайхамшигтай тохиолдол бол Б.Билгүүний дөрөвдүгээр нүхэнд хийсэн Hole-in-one байсан юм. Гольфийн спортод энэ тохиолдол 60 сая удаад нэг гардаг гэж үздэг байна. Өсвөр насны хүүхэд багачуудын зүрхэнд гольфийн спортын галыг асааж улмаар уг спортын сонирхогчдын тоог нэмэгдүүлснээр ирээдүйд дэлхийн түвшинд өрсөлдөх тамирчдыг бий болгох зорилго нууц биш байлаа.

Тэмцээнд МГХ-оос зохион байгуулсан “Өсвөрийн гольфийн төсөл хөтөлбөр” арга хэмжээнд зуны улирлын туршид сургалтанд хамрагдсан хүүхдүүд идэвхтэй оролцов. Уг төсөл хөтөлбөрийг БТСГ-аас бодлогоор дэмжиж дөрвөн сая төгрөгийг санхүүжилтийг олгосон юм.Тэмцээний ерөнхий ивээн тэтгэгч French Town компани ажиллалаа.

Цаашид жил болгон зохион байгууллагдах энэ тэмцээнд улам бүр олон хүүхэд багачууд хамрагдаж, аваргын цомын эзэн болох нь төдий чинээ хэцүү болж төгөлдөрийн төгөлдөр ур чадвартай тамирчид PGA –ыг донсолгох цаг бидний дэргэд байна хэмээн Монголын гольфийн холбооноос мэдээлэв.