2018-2019 оны хичээлийн шинэ жил эхлэхтэй холбогдуулан Нийслэлийн Тээврийн газраас авч хэрэгжүүлж буй арга хэмжээний талаар Нийслэлийн Хэвлэл мэдээллийн төвд мэдээлэл хийж байна.

Нийслэлийн Тээврийн газрын орлогч дарга Х.Булгаа:

"Хичээлийн шинэ жилийг угтан наймдугаар сарын 25 буюу энэ бямба гарагаас эхлэн тээврийн хэрэгслийн тоог 10 хувиар нэмэгдүүлнэ. Иргэдийн зорчих эрэлт нэмэгдэж байгаагаас гадна энэ бямба, ням гарагт дугаарын хязгаарлалт үйлчлэх болсонтой холбогдуулаад энэ арга хэмжээг авч байна.

Автобус хоорондын зай богиносч, хотын төвд 7-8 минутын хүлээгдлийн хугацаатай болж байна

Ажлын өдрүүдэд нийт 959 автобус, троллейбус явж, энэ утгаараа автобус хоорондын зай богиносч байна.  Өөрөөр хэлбэл хотын төвд 7-8 минутын хүлээгдлийн хугацаатай болж байна." гэлээ.

Мөн нэр бүхий 12 чиглэлд автобусны оройн буух цагийг 22:30-23:00 болгон нэмэгдүүллээ.

Үүнд: 

• Шархад
• Хужирбулан
• Тахилт,
• Улаан-Хуаран,
• Их тойруу,
• Гачуурт,
• Дэнжийн мянга
• Зайсан,
• Улиастай чиглэлийн автобуснууд 23 цаг хүртэл үйлчилнэ.

АВТОБУС, ТРОЛЛЕЙБУСНУУДАД ХЯНАЛТ ШАЛГАЛТ ХИЙЛЭЭ

Түүнчлэн автобус, троллейбусны өнгө үзэмж, цэвэрлэгээ, техникийн бүрэн бүтэн байдалд хоёр үе шаттай шалгалтыг наймдугаар сарын 13-31-ний өдрүүдэд хийж байна. 

Шалгалтыг нийтийн тээврийн хэрэгслийн дотор, гадны талын цэвэрлэгээ, суудлын бүрээсний угаалга, техникийн бүрэн бүтэн байдал зэргийг байгууллага дээр нь өглөөний эх авах үед хийж гүйцэтгэнэ.

ХҮҮХДИЙН АВТОБУСЫГ ШАЛГАЛАА

ЕБС-ийн, цэцэрлэгийн "Хүүхдийн автобус"-ны стандарт, хангалт, хүүхдийг нэгдсэн зохион байгуулалтаар техникийн шаардлага хангасан автобусаар тав тухтай аюулгүй тээвэрлэх нөхцөлийг бүрдүүлэх зорилгоор Нийслэлийн тээврийн газар, Замын цагдаагийн алба, Нийслэлийн Боловсролын газартай хамтран шалгалт зохион байгуулж, нийт 54 сургууль, хоёр цэцэрлэгийн нийт 124 автобус хамрагдахаас 36 сургуулийн 46 автобус хамрагдлаа.

Тэдгээрээс 13 автобус техникийн бүрэн бүтэн байдлын шаардлагыг хангаж "Хүүхдийн автобус"-ны зөвшөөрөл авсан.

НИЙТИЙН ТЭЭВРИЙН ХӨЛС ТӨЛӨЛТӨД ШАЛГАЛТ ХИЙЖ БАЙНА

Нийтийн тээврийн үйлчилгээний хөлс төлөлтийн байдалд тавих хяналтыг сайжруулах, хууль, журмыг олон нийтэд таниулах, мэдээлэл сурталчилгаа хийх, зөвлөмж материал тараах, үйлчилгээний соёлыг дээшлүүлэх, илэрсэн зөрчлийг арилгуулах зорилгоор  шалгалт хийж байна.  

Нийтийн тээврийн үйлчилгээтэй холбоотой санал гомдлыг 24 цагийн турш Нийслэлийн тээврийн газрын тээвэр зохицуулагчид 7004-4040 утсаар өгөх боломжтой.

"Улаанбаатар смарт карт" ХХК хэлтсийн дарга Ц.Түвшинжаргал:

"Шалгалтын ажилтай холбоотойгоор гэрээт цэгүүдийн үйл ажиллагааг сайжруулах, тааруу ажиллаж байгаа цэгүүдийг илүү сайн ажилладаг ТҮЦ, дэлгүүр рүү шилжүүлэх ажлыг хийж байна. Өнөөдрийн байдлаар 538 карт борлуулах, цэнэглэх гэрээт цэг ажиллаж байна. Автобусны буудлын ойролцоох ТҮЦ, дэлгүүр, сонин борлуулах цэгүүдтэй хамтарч ажиллаж байна. Цэнэглэлтийн үйлчилгээг сайжруулах зорилгоор 24 цагаар ажилладаг Circle K сүлжээ дэлгүүртэй гэрээ байгуулан ажиллаж байна. Ингэснээр зорчигчид 24 цаг картаа цэнэглүүлэх боломжтой. 

Картаар төлбөрөө төлөх төлөх төлбөрийн картуудын боломжийг сайжруулах ажиллаж байна. 

UMoney  буюу энгийн картаар үйлчлүүлэхээс гадна нэмэлт гурван төрлийн картаар төлбөр төлөх боломжтой. Үүнд:

• Банкны картаар төлбөр төлөх боломжтой /Одоогоор Хаан банкны картаар төлөх боломжтой. Цаашдаа Голомт банкны картыг үйлчилгээнд нэвтрүүлнэ. / Ингэснээр заавал гэрээт цэгээр цэнэглүүлэх шаардлагагүйгээр картынхаа дансыг цэнэглээд үйлчлүүлэх боломжтой.
• Гар утасны Сим карт /Мобиком, Юнителийн тусгай сим карттай байх хэрэгтэй бөгөөд гар утсаа ашиглаад төлбөрөө төлөх боломжтой/
• Имарт болон Номин сүлжээ дэлгүүрийн бонус картаар төлбөрөө төлөх боломжтой болсон. 

Төлбөрөө төлөөгүй иргэд хуулийн дагуу 10 мянган  төгрөгөөр торгуулах хуулийн заалт байдгийг санууллаа