Долоо дахь удаагийн УИХ-ын чуулганы анхны хуралдаан болж байна.

Парламентад 65 суудал авсан МАН-аас УИХ-ын даргад намын дарга М.Энхболдыг нэр дэвшүүлж байгаагаа намын нарийн бичгийн дарга С.Бямбацогт илтгэлээ.

МАН-ын Удирдах зөвлөл хуралдаж дээрх шийдвэрийг гаргасан байна.

УИХ-ын гишүүн Л.Болд нэр дэвшигчийн талаар "Өнгөрсөн дөрвөн жилийн хугацаанд та бүхэн намын дарга УИХ-ын дарга байх нь зохимжгүй хэмээн бидний эсрэг талд байсан. Одоо энэ бодлоосоо ухарч байгаа юм уу"  гэсэн асуултыг асуусан юм.

Үүний хариуд УИХ-ын гишүүн М.Энхболд "Манай намаас ингэж ярьж байсан гишүүд байж болох юм. Гэхдээ ямар нэг байдлаар албан бичиг, албаны баримт намын дарга УИХ-ын дарга байх зохимжгүй талаар нэг ч зүйл гараагүй. Намынхан болон удирдах зөвлөлийн шийдвэрийг би дагана" гэв.

Дөнгөж сая санал хураалт болж М.Энхболдыг 66 гишүүн буюу 86.8 хувийн саналаар УИХ-ын даргаар сонголоо. Тэрээр яг одоо УИХ-ын тамгаа авч байна.

Миеэгомбын Энхболдын тухай

М.Энхболд 1982 онд Нийслэлийн 10 жилийн 1 дүгээр дунд сургууль, 1987 онд Монгол Улсын Их Сургууль төгссөн.  Эдийн засагч мэргэжилтэй. Эдийн засгийн ухааны магистр.

Тэрбээр

• 1987-1989 онд Улаанбаатар хотын Ардын депутатуудын хурлын гүйцэтгэх захиргааны харъяа Ахуйн үйлчилгээний удирдах газарт эдийн засагч,
• 1989-1991 онд Нийтийн аж ахуйн үйлчилгээний яамны Төлөвлөлт аж ахуйн механизмын хэлтэст мэргэжилтэн, 1991-1992 онд Улаанбаатар хотын Ардын депутатуудын хурлын гүйцэтгэх захиргааны Ахуйн үйлчилгээний хэлтсийн дарга,
• 1992-1996 онд Нийслэлийн Чингэлтэй дүүргийн Засаг даргын орлогч,
• 1996-1998 онд Нийслэлийн Чингэлтэй дүүргийн Иргэдийн Төлөөлөгчдийн Хурлын Тэргүүлэгчдийн дарга,
• 1997-2005 онд Нийслэлийн Монгол Ардын Хувьсгалт Намын хорооны дарга,
• 1999-2005 онд Нийслэлийн Засаг дарга бөгөөд Улаанбаатар хотын захирагчийн албыг тус тус хашиж байв.

М.Энхболд 2005-2008, 2008-2012 онд Монгол Улсын Их Хурлын гишүүн, 2005-2007 онд Монгол Ардын Хувьсгалт Намын дарга, 2006-2007 онд Монгол Улсын Ерөнхий сайд,  2007-2012 онд Монгол Улсын Засгийн газрын гишүүн, Монгол Улсын Шадар сайдаар томилогдон ажилласан байна.

Тэрээр  2012 оны Улсын Их Хурлын  зургаа дахь удаагийн сонгуулиар Монгол Улсын Их Хурлын гишүүнээр дахин сонгогдон ажилласан.

М.Энхболд 2012 оны 12 дугаар сарын 27-ны өдөр Монгол Улсын Их Хурлын дэд даргаар сонгогдон ажилласан бол өнөөдөр ийнхүү УИХ-ын даргаар сонгогдлоо. 

Гэрэл зургийг Б.Бямба-Очир /MPA.mn/