Залуу жүжигчдээр халаагаа бэлдэж буй "X Түц" продакшн сүүлийн үед драмын жүжиг, кино урлагт хүчээ сорих болсон. Саяхан нээлтээ хийгээд буй "Миний хөрш чөтгөр" киноны гол дүрийг бүтээсэн жүжигчин Т.Бархүүтэй уулзаж шинэхэн кино болон хувийн амьдралынх нь талаар ярилцсанаа уншигч танд хүргэе.

-Танай хамтлагийнханы бүтээсэн кино гарсан даруйдаа хүмүүсийг хуйлруулж байгаа.
Мэдээж та бүхний хөдөлмөрийн үр дүн байх?
-Бид киногоо 8 сарын 16-нд хийж эхэлсэн. Монгол улс олимпоос анхны алтан медалиа авсан тэр өдөр киноны зураг авалтаа эхэлсэн. Төлөвлөсөн өдөр маань тийм сайхан билэгшээлтэй өдөр таарсан болохоор их билэгшээж, урам зориг эрч хүчтэй ажлаа эхэлсэн. Түвшинбаярыг аварга болоод медалиа авч байх мөчид бид зураг авалтаа түр зогсоогоод хүндэтгэл үзүүлж баяр тэмдэглэсэн. Кино маань ч амжилттай, бүтэмжтэй хийгдэж дуусаад 3-р сарын 7-нд нээлтээ хийлээ. "Миний хөрш чөтгөр" киног 2 сарын хугацаанд хийсэн. Энэхүү киног хийхэд туслалцаа үзүүлсэн олон пүүс компаниуддаа баярлаж, талархсанаа илэрхийлье.

-Нэг хэсэг хийгдэж байсан монгол кинонууд теле жүжгийн хэмжээнд ч хүрэхээргүй, чанаргүй бүтээлүүд гардаг байсан. Харин сүүлийн үед ахиц гарч байгаа. Танай кино чанар чансааны хувьд ямар болов?
-Энэ кинонд манай хамтлагийн жүжигчид болон гаднаас жүжигчин, дуучин гээд 5 хүн тоглуулсан. Мэдээж X Түц продакшны жүжигчид чадварлаг гэдгийг үзэгчид мэднэ. Мөн үзэгчдийн оюуны боловсрол, шалгуур их өндөр болсон байна. Тийм болохоор үзэгчдийн шалгуурыг давж гарах бүтээл хийдэг гэдэгтээ бид бардам байдаг. Энэ кино ч мөн сайн бүтээл болсон гэдэгт манай удирдлагууд болон жүжигчид их итгэлтэй байгаа. Киноны нээлтэн дээр ч үзэгчдийн байдлыг харахад маш сайхан хүлээж авсан. 90-ээд оны үед гарч байсан кинонууд техник, жүжигчдийн хувьд жаахан тиймхэн байсан л даа. Одоо хийгдэж байгаа кинонуудыг харьцуулаад үзэхэд дэвшил гарч байгаа ш дээ. Техник, тоног төхөөрөмжийн хувьд ч сайжирсан. Яахав зарим жүжигчдийн тал дээр доголдолтой зүйл их байдаг. Манай киноны хувьд "Үхэж үл болно" кинонд ашигласан бүх төхөөрөмжийг авч хэрэглэсэн. Киноны найруулагчаар МУГЖ И.Одончимэг ажилласан. Одноо маань энэ киног маш сайн найруулсан. Тэгэхээр киноны хувьд чанаргүй болсон гэж айх юм байхгүй дээ.

-Та бол залуу жүжигчин. Кинонд тоглоход бэрхшээлтэй зүйл их тулгарч байв уу?
-Урьд нь киноны гол дүрд тоглож байгаагүй болохоор бэрхшээлтэй зүйл их гарч байсан. Би бол шинэ залуу жүжигчин. Энэ киноны хувьд анхны маань гол дүрээр миний чадал чансааг үзэгчид дүгнэх учраас маш их хичээж бүх л авьяасаа шавхаж гаргасан даа. Урьд нь "Надтай гэрлээч" кинонд туслах дүрд тоглож байсан. Зарим зүйл дээр туршлага дутах явдал гарч байлаа.

-Жүжигчний мэргэжлийг аль сургуульд эзэмшсэн бэ?
-Би нийслэлийн 13-р сургуулийг 1998 онд төгссөн. 2004 онд СУИС-ийн жүжигчний ангийг доктор профессор С.Сугар багшийнхаа удирдлаган доор төгссөн. Энэ сайхан мэргэжлийг эзэмшүүлсэн хайртай багшдаа баярлаж явдагаа илэрхийлье.

-Хошин урлагийн продакшнуудын ирээдүйн өнгийг залуу жүжигчдээр тодорхойлж байгаа. Танай продакшны залуу жүжигчид хэр сайн "залгамжлагч" нар гэж боддог вэ?
-Нэг үеэ бодвол залуу жүжигчид их нэмэгдсэн. Одооноос ялангуяа эрэгтэй жүжигчид хошин урлагт хөл тав»ж^айна. Яахав сайн ч жүжигчид байна. Муу ч жүжигчид байна. Манайд Батаа, Төтө хоёроос авахуулаад сайн жүжигчид бий. Бид нар өөрсдийгөө айхтар чадалтай жүжигчид гэж хэлэхгүй. Ямар ч байсан суралцаж байна.

-Дараагийнхаа ажилд орчихсон байх?
-Өдөр шөнөгүй ажиллаж байна.Ажиллана гэдэг сайхан ш дээ. 3 сарын 15-нд шинэ тоглолт тавих гээд бэлдэж байна. Байнга ажилтай байдаг болохоор яг л нэг гэр бүл шиг байдаг. Бие биедээ ч их хайртай.

-Хичнээн завгүй ч Мартын 8-аар бүсгүйчүүдээ баярлуулсан биз дээ?
-Баярлуулалгүй яахав. Манайхан 3-р сарын 7-нд киноныхоо нээлтийн дараа хүлээн авалт хийж хүүхнүүдээ баярлуулсан.

-МУГЖ И.Одончимэг та хоёрын хамтын амьдралыг хүмүүс мэддэг болсон. Ер нь та хэзээнээс Одончимэг гавьяатыг харж хайрлаж байв?
-Жүжигчнийх нь хувьд хүндэлж биширдэг байсан. X түц продакшнд орсноос хойш харж явдаг байлаа. Мэдээж эхний ээлжинд харах мэдрэмжээрээ л дурлана шүү дээ. Алаг нүд, ааш зан нь таалагддаг. Ер нь бүх зүйл нь таалагддаг.

-Ойр дотныхон чинь яаж хүлээж авч байв?
-Бид хоёрыг нийлэхэд олон хүн гайхаж байсан. Мэдээж бэрхшээлтэй байлгүй яахав. Гэхдээ тэр бүхнийг хамт даваад гарчихсан. Хүмүүс биднийг зөвөөр ойлгоно байх.

-Та хоёр хэзээ албан ёсоор гэр бүл болох гэж байна? Мэдээж төлөвлөсөн биз дээ?
-Бодолгүй яахав. Гэхдээ тэр талаар одоо яримааргүй байна. Цаг хугацаа харуулна биз дээ.

-Танай гэр бүлд урлагийн хүн бий юу? Яагаад жүжигчний мэргэжил сонгосон юм бэ? Тэр тусмаа хошин урлагийг сонгох болсон шалтгаан жүжигчин Одноо биш биз дээ?
-Манай гэр бүлд жүжигчин хүн байхгүй ээ. Миний өөрийн сонирхол юм л даа. Би ер нь эрх чөлөөтэй, өөрийн дураар байхыг хүсдэг. Тийм учраас X түц продакшнд орсон. Ямарваа нэг юманд баригдахыг хүсдэггүй. X түц продакшн манайд тоглоод үз гэж дуудаж байсан. Анх X түц-ийнхээ тайзыг зөөж л ажлаа эхэлж байлаа. Одоо бол туслах дүрд тоглож байна. X түц продакшнд ажиллана гэдэг хэн хүнд олдоод байдаггүй том боломж гэж би боддог.

-Таныг хошин урлагт байхаас илүү драм, кино урлагт ажиллахад дүр төрхийн хувьд тохирсон гэж хүмүүс ярьдаг?
-X түц продакшн бол тэр бүгдийг надад олгодог. Шоу тоглолт, кино мюзикл ч хийж байна. Бүрэн хэмжээний уран сайхны кино хийж байна. Телевизийн зохиомж нэвтрүүлгүүд ч хийж байна. Драмын жүжиг тавьж байна. Ийм л учраас энэ өргөн цар хүрээтэй продакшнаас гарч өөр газар орж ажиллах сонирхол огт байдаггүй. Инээдмийн түц гэдэг нэрийг X түц гэж өөрчилсөний учир нь бас энэ шүү дээ. X нэрийн дор юу ч байж болно гэсэн үг.