УИХ-ын 6-р тойрог буюу Хэнтий, Дорнод, Сүхбаатарын долоон мандатын нэгийг АН-д авчирсан нэр дэвшигч бол Ш.Бямбасүрэн.

Тэрбээр УИХ-ын гишүүн асан Ц.Шинэбаярын хүү.

Ерөнхий сайд Л.Оюун-Эрдэнэ тэргүүтэй П.Анужин, Н.Ганибал нарын УИХ-ын гишүүдтэй өрсөлдөн намдаа нэг суудал авчирсан тэрбээр Дорнод аймгийн болон Хэрлэн сумын ИТХ-ын төлөөлөгч.

Урьдчилсан байдлаар тус тойргийн 42 мянган хүний саналыг авснаар тэрбээр 7 мандатын зургадугаарт эрэмблэгдэж, УИХ-д суух болзол хангаад байна.

Тэрбээр 1988 онд төрсөн, АНУ-д ахлах сургуулиа дүүргэж, эдийн засгийн чиглэлээр суралцан Англи, Австралийн их сургуульд бакалавр, магистрт суралцсан. Эхнэр, хүүхдийн хамт 2017 оноос Дорнод аймагт ажиллаж, амьдардаг.

УИХ-ын гишүүн агсан Ц.Шинэбаяр Дорнод аймгийн ИТХ-аас эхлэн УИХ-д өөрийн гэсэн өнгө төрхийг харуулсан улс төрч. 2008-2012 онд Дорнод аймгаас Улсын Их Хуралд сонгогдон ажиллаж байсан билээ.

Улс төрийн ууган нам МАХН нэрээсээ Х үсгээ авч хаяж хоёр хуваагдахад, уугуул нэрээ сэргээх хүсэлтэй гишүүдийн хамт Түр штаб байгуулан тэмцэж явсан бөгөөд 2016 оноос Хамуг Монголын Хөдөлмөрийн намыг байгуулан даргаар нь ажиллаж байв.

ХАСХОМ-д мэдүүлсэн хөрөнгө орлогодоо:

• Өөрийн жилийн орлого: 166,488,000 төгрөг
• Өрхийн жилийн орлого: 31,000,000 төгрөг
• Орон сууц, барилга байгууламж: 994,000,000 төгрөгийн үнэ бүхий хоёр амины, нэг нийтийн орон сууц
• Тээврийн хэрэгсэл: 100,000,000 төгрөгийн үнэлгээ бүхий Land Rover, Range Rover- 1
• Мал аж ахуй: 128,000,000 төгрөгийн үнэ бүхий Хурдан удмын адуу-4, Сайн үүлдрийн үхэр-14, Үхэр-78
• Газар: Өмчлөх-700м2-1
• Үнэт эдлэл: 40,000,000 төгрөгийн үнэт эдлэл
• Хадгаламж: 29,308,000 төгрөгийн дотоодын хадгаламж
• Хувьцаа: Эрдэнэс Таван толгой ХК, Адуунчулуун ХК, Гранд восток Монголиа ХХК (544ш, 571813ш, -ш)-тай хэмээн мэдүүлжээ.