Манай орны 0-5 насны таван хүүхэд тутмын нэг нь хоол тэжээлийн архаг дутагдалтай гэх судалгааг 2006 онд НҮБ-аас гаргасан билээ. Гэвч энэ тоо буурах биш, өсөх хандлагатай байгаа аж. Тиймээс энэ талаар ACF-Монголд төрийн бус байгууллагын хоол тэжээллийн хэлтсийн дарга Д.Ганзоригоос тодрууллаа.

-Бага насны хүүхэд хоол тэжээлийн архаг дутагдалд орох нь хүүхдийн биед ямар сөрөг нөлөөтэй вэ?
-Хүүхэд хоолоор дамжуулан хэрэгтэй амин дэмээ авч чадахгүй бол хоол тэжээлийн архаг дутагдалд ордог. Ингэснээр жин өсөлт нь удааширч сэтгэн бодох чадвар нь муудна. Филиппинд гэхэд хоёр нас хүртлээ ийм дутагдалтай байсан хүүхэд муу сурч, үеийнхнээсээ бие бялдар, оюун ухааны чадвар дутмаг болохыг тогтоосон. Хүн бага насандаа 2-3 дахин жин нэмдэг. Өөрөөр хэлбэл 3 кг төрсөн хүүхэд ой хүрэхдээ 10 орчим кг болно. Ийм өсөлт ахиж болдоггүй учир энэ үед л сайн хооллож байх хэрэгтэй.

-Хоол тэжээлийн архаг дутагдал бусад улсад хэр их байдаг вэ?
-Бид өөрсдийгөө аль нэг улс оронтой харьцуулж болохгүй. Яагаад гэвэл ийм дутагдал нь нийгмийн эрүүл мэнд, улс орны хөгжилд сөрөг нөлөөтэй. Яагаад гэхээр өлсгөлөн хүний хөдөлмөрлөх чадвар нь багасдаг. Манайд 1992 оноос хоол тэжээлийн архаг дутагдалтай хүүхдийн тоо дорвитой буурахгүй тав эсвэл зургаан хүүхдэд тутмын нэг нь хоол тэжээлийн дутагдалтай байна. Ирэх жил дахин ийм судалгаа хийх болно. Яагаад гэхээр хүнсний бүтээгдэхүүний үнэ өсөхөөс гадна жил ирэх тусам хүүхдийн өсөлт хурдасч амин дэм ихтэй тэжээл илүү хэрэгтэй боллоо.

-Манай улсад яагаад ийм архаг дутагдал байна вэ?
-Эцэг эхчүүд маань хүүхдэд бантан, кааш өгөхөд л хангалттай гэж боддог. Энэ буруу. Лууван, ургамлын тос зэрэг амин дэмтэй хүнсний бүтээгдэхүүнээр баяжуулах хэрэгтэй байдаг. Тиймээс бид 0-5 насны хүүхдийн өсөлт бүртгэлийн дэвтрийг шинэчлэн хоолны зөвлөгөөг оруулсан. Гэхдээ Сонгинохайрхан дүүрэгт 20 мянган хувь л тараагдсан байгаа. Мөн хүүхдэд хэрэгтэй хүнсний бүтээгдэхүүн худалдаанд элбэг ч ядуу эцэг эхчүүд авч чаддаггүй. Өрхийн орлого багатай гэр бүлд хорооноос гурил, будаа өгдөг боловч амт чанар муутай.

А.Амартүвшин