• Шүүхийн шийдвэргүйгээр нураах нь хууль бус хэмээн S'Outlet дэлгүүрийнхэн үзэж байна
• Өнгөрсөн сарын 31-ний өдөр тус барилгыг буулгах захирамжийг Нийслэлийн удирдлагууд гаргасан
• Өнөөдөр тус зам дагуу барьсан үерийн даланг цэвэрлэх ажлыг зохион байгуулна

Сүхбаатар дүүргийн нэгдүгээр хороо, S'Outlet дэлгүүрийн хамт олон шүүхийн шийдвэргүйгээр барилгыг нураах нь хууль бус хэмээн үзэж буйгаа илэрхийлж байна.

Өнгөрөгч долоодугаар сарын эхээр нийслэл хотод үргэлжлэн орсон борооны улмаас үүссэн үерийн нөхцөл байдлаас хамгаалах зорилгоор Сүхбаатар дүүргийн 1 дүгээр хороо, Натурын гүүрнээс S outlet дэлгүүр хүртэл Сэлбэ гол дагуу элс, хайргаар шороон түр далан босгосон. Энэхүү үерийн даланг зөөвөрлөж, цэвэрлэх ажлыг зохион байгуулахаар өнөөдөр зам хаагаад байгаа юм.

Тус дэлгүүрийн зүгээс хүч түрэн барилгыг нураах гэж буйг ийнхүү эсэргүүцэж байгаа гэв. Өнгөрсөн сарын 31-ний өдөр Нийслэлийн удирдлагууд үерийн эрсдэлтэй бүсэд байгаа тус барилгыг буулгах захирамжийг хүргүүлсэн. Харин захирамжийн дагуу шүүхийн шийдвэр гарах хүртэл буруутай гэж үзэх боломжгүй хэмээн тус байгууллага байр сууриа илэрхийлж байна.

Үер болсноос хойш цахилгаангүй байгаа тул дэлгүүр ажиллаагүй, ажилчдынхаа цалинг тавих боломжгүй болсон гэв.

Өнөөдөр 08.00 цагт Сэлбэ голын далангийн шороог тус дүүргийн тохижилт, үйлчилгээний ажилтнууд зөөж эхэлсэн юм.  

Нийслэлийн  газар зохион байгуулалт, кадастрын хэлтсийн дарга Б.Загдсамбар “Өнөөдөр голын голдирол хаасан буюу зөвшөөрөлгүй ашиглаж буй газрын талбайг буулгана. Одоогоор S outlet барилгыг  буулгахгүй. Гурав хоногийн хугацаатай тухайн газрыг чөлөөлөх албан мэдэгдэл хүргүүлсэн ч чөлөөлөөгүй байсан. Тиймээс тус газрыг албадан буулгаж эхэлж байна” гэв.

"S outlet" дэлгүүрийн менежер Ж.Мөнхтөр “Манай барилгыг буулгах шийдвэр, захирамжийг үндэслэн хуульд заасны дагуу 30 хоногийн дотор бид шүүхэд хандах эрхтэй байдаг. Гэтэл нийслэлээс энэ боломжоор хангаагүй тул эсэргүүцэж байна. Манай барилгыг голын голдирол руу түрж орсон мэтээр яриад байна. Үнэндээ яг энэ хэсгийг хэмжсэн, нотлох баримт, мэдэгдэл бидэнд ирүүлээгүй.

Хамгийн гол нь голыг шахсан гээд байгаа хэсэг манай барилгын зүүн талд байрлах явган хүний зам дагуу байсан. Бид барилгын гадна талбайн тохижилтын даалгаврын хүрээнд голын далан дээгүүр явган хүний зам тавьсан. Шүүхийн шийдвэр гараагүй байхад буулгана гэдэг буруу. S outlet дэлгүүр 20 жилийн өмнө байгуулагдаж байсан. Энэ бренд болон бизнесийн нэр төрд халдаж байна. Үерийн дараа цахилгаан ирсэн ч хэдэн өдрийн өмнө тасалчихсан. Эрчим хүчнийхээ хуульд хүртэл цахилгаан хязгаарлахаасаа өмнө 48 цагийн өмнө мэдэгдэл хүргүүлэх ёстой байдаг” гэв.