-Сургалтын хөтөлбөрийг докторын ажлын түвшинд судлаад олон дутагдал илрүүлсэн байна-

ШУТИС бол манайдаа инженер-техникийн боловсон хүчин бэлтгэж байгаа үндэс­ний хамгийн том эрдмийн уурхай билээ. Энэ сургуулийн тухай сайнтай, муутай олон л мэдээлэл байдаг. Харин саяхан тус сургуулийн багш О.Алтангэрэл сургуулийнхаа сургалтын хөтөлбөрийг док­то­рын ажлын түвшинд суд­лаад олон дутагдал илрүүл­жээ. Улмаар "Инжене­рийн зурагзүй" гэдэг хичээ­лийн жишээн дээр дутагд­луу­дыг арилгаж, тэр нь сургалтын үр дүнг багагүй дээшлүүлсэн байна.

Ингээд энэ талаар сонир­хож үзлээ. О.Алтангэрэ­лийн судалгааны ажлын сэдэв нь: "Сургалтын хөтөлбөрийг хэрэглээ төвтэй боловсруу­лах арга зүйн зарим асуудал" бөгөөд судалгааны объект нь сур­галтын хөтөлбөр юм байна.

Зорилго нь сургалтын хөтөлбөрийг сонирхлын бүл­гүү­дийн оролцоотойгоор хэ­рэг­лээ төвтэй боловсруулах арга зүй боловсруулан хэрэг­жүүлж, үр дүнг "Инженерийн зурагзүй"-н хичээлийн жи­шээн дээр туршин тодор­хойл­жээ. Ингэхдээ 160 гаруй хүмүүсийг хамарсан анкет, судалгаа, ярилцлага, экспер­тийн үнэлгээ, баримт бичгийн анализын аргаар судалгаа явуу­­лан дүгнэлт хийжээ.

Тэрээр доорх дутагдлууд ШУТИС-ийн сургалтын хө­төл­бөрт оршиж байгааг тог­тоосон байна. Үүнд:
-Судлагдахууны хүрээ хэт шинжлэх ухаанжсан байдалтай.
-Судлагдахуун нь амьд­рал, хэрэглээний ач холбог­дол багатай учраас хэрэг­лээнд ордоггүй.
-Хөтөлбөрийн агуулгыг сонгон боловсруулах аргазүй, үндэслэл дутмаг.
-Суралцагчийн хэрэгцээ, сонирхлыг бодитойгоор хар­галз­даггүй, багш болон сурал­цагчийн үүрэг тодорхойгүй.
-Хөтөлбөр боловсруулах ажилд сонирхлын бүлгүүдийн оролцоо дутмаг.
-Судлагдахууны бүтэ­цийн дидактик боловсруулалт хангалтгүй, сэдэв хоорондын болон хичээл хоорондын логик уялдаа, интеграци тодор­хойгүй.
-Сургалтын хөтөлбөрийг киррикюлимийн иж бүрдэл, тогтолцоот байдлаар хий­дэггүй.
-Сургалтын зорилго, зо­рилт тодорхой биш, онош­лог­дох боломж муутай.
-Сургалтыг төлөвлөх, зо­хион байгуулах дүгнэх үйл ажиллагаанд суралцагчийн оролцоог тооцдоггүй.

Судлаач дээрх дутаг­дал, доголдлыг тодор­хой­лохдоо:
-Хөтөлбөрийн зорилт су­рал­цагчийн эрэлт, хэрэгцээ түүний өөрчлөлтөд тулгуур­лаж байх,
-Хөтөлбөрийн агуулгын элементүүд зорилтын хэрэг­жилтэд тодорхой үүрэг, хэ­рэг­лээний ач холбогдолтой байх,
-Сургалтын арга тех­но­логи нь зорилтоор удирдах эзэмшсэн мэдлэгийг хэрэг­лэх, үйл ажиллагааны арга барил эзэмшүүлэх чиглэлтэй байх гэж дүгнэсэн байна.

О.Алтангэрэл ШУТИС-ийн сургалтын хөтөлбөрийг бүхэлд нь судалсан болол­той. Тийм учраас тус сур­гууль дээрх дутагдлуудыг нягтлан үзэж албан ёсны дүгнэлт гаргах биз ээ. Учир нь эдгээр дутагдал, доголдол нь сургуулийн удирдлагын тө­дий­гүй нийт хамт олны нэр хүнд, эрх ашгийг шууд хөн­дөх зүйл билээ. Хэрэв эдгээр дутагдлууд үнэхээр байгаа нь үнэн бол шинэчлэл шаард­лагатай гэдэг нь ойл­гомжтой юм.

Д.Ариун