Энэ намар нийт 1.2 сая тонн ургац хураах тооцоолол гарсан гэж албаныхан мэдээлсэн. Нийт ургацыг нэг тонн ачааны багтаамжтай Хьюндай портер машинд ачна гэж тооцоолбол сая 200 мянган ширхэг портер машин хэрэг болно гэсэн үг юм. 

Харин 50 кг жингийн шуудайд энэ намар хураах ургацаа хувааж хийнэ гэж тооцвол нийт 24 сая шуудай ургац болно. 

Энэ жил улсын хэмжээнд 369.7 мянган га-д үр тариа, үүнээс 317.9 мянган га-д улаанбуудай, 12.8 мянган га-д төмс, 13.4 мянган га-д хүнсний ногоо, 94.1 мянган га-д малын тэжээл, 90.4 мянган га-д тосны ургамал нийтдээ 580.4 мянган га талбайд тариалалт хийгджээ.

Өмнөх оны газар тариалангийн үйлдвэрлэлтэй харьцуулахад улаанбуудайн ургац 229.6 мянган тонноор буюу 85.8 хувиар, бусад үр тариа 18.4 мянган тонноор буюу 46.1 хувиар, төмс 54.1 мянган тонноор буюу 47.4 хувиар, таримал тэжээл 3.6 мянган тонноор буюу 1.8 хувиар, техникийн ургамал 3.6 мянган тонноор буюу 60 хувиар тус тус өсөх төлөвтэй байна.

Харин хүнсний ногооны ургац өмнөх оноос 21.4 мянган тонноор буюу 8.9 хувиар буурах урьдчилсан тооцоо гарчээ. Урьдчилсан судалгаагаар хэрэгцээт хүнсний улаанбуудай, төмсний 100 хувь, хүнсний ногооны 67.7 хувийг дотоодын ургацаас хангах боломжтой гэж албаныхан дүгнэжээ.

Энэ цаг үед тариалан эрхлэгч иргэн, аж ахуйн нэгжүүдээс ажиллах хүчний захиалга ирүүлсний дагуу Зэвсэгт хүчний нэгтгэл анги, Үндэсний батлан хамгаалахын их сургууль, Хөдөө аж ахуйн их сургуулийн нийт 2800 цэргийн алба хаагч, сонсогч, оюутан залуучуудыг ургац хураалтын ажилд оролцуулахаар бэлтгэл ажлыг хангаж буй тухай Хүнс, хөдөө аж ахуй, хөнгөн үйлдвэрийн сайд Ц.Идэрбат энэ сарын 26-ны өдөр Засгийн газрын хуралдаанд танилцуулсан.

Засгийн газрын тогтоолын дагуу 08 дугаар сарын 28-ны өдрийн байдлаар ЗХЖШ-ын даргын тушаалаар Хуурай замын цэргийн 5 нэгтгэл, ангийн 200 гаруй цэргийн алба хаагч төмс, хүнсний ногооны ургац хураалтад ажиллаж байна.

Эх сурвалж: Төрийн байгууллагын нэгдсэн цахим хуудас