СОР17-ын хүрээнд НҮБ-ын Цөлжилттэй тэмцэх конвенц (UNCCD) болон Монголын Бизнесийн Зөвлөл (МБЗ) нар өчигдөр (2026.08.27) Business4Land Mongolia Hub байгуулах тухай Санамж бичигт гарын үсэг зурлаа.

Business4Land (B4L) нь UNCCD-ийн албан ёсны санаачилга бөгөөд газрын доройтлыг бууруулах, доройтсон газрыг нөхөн сэргээх, гангийн тэсвэржилтийг нэмэгдүүлэхэд хувийн хэвшлийн оролцоо, хөрөнгө оруулалт, инновацыг дайчлахад чиглэдэг. Тус санаачилгыг Франц болон БНХАУ-д байгуулсан бөгөөд Монгол Улс гурав дахь улс болж байна. Ингэснээр Монголын бизнесийн салбарт олон улсын түншүүд, хөрөнгө оруулагчид, мэдлэг, туршлагатай холбогдох шинэ боломж нээгджээ. 

Санамж бичгийн хүрээнд Монголын Бизнесийн Зөвлөл нь Монгол Улс дахь Business4Land Hub-ыг хариуцан ажиллаж, олон улсын Business4Land Hub сүлжээний нэг хэсэг болох бөгөөд үндэсний платформыг хөгжүүлнэ.

Санамж бичигт UNCCD-ийг Гүйцэтгэх нарийн бичгийн дарга Доктор Ясмин Фоуад болон Монголын Бизнесийн Зөвлөлийг Гүйцэтгэх захирал Н.Сувд нар гарын үсэг зуржээ. 

Монгол Улсын хувьд газрын доройтол, цөлжилт, ган, бэлчээрийн доройтол нь зөвхөн байгаль орчны асуудал биш бөгөөд ус, хүнсний аюулгүй байдал, мал аж ахуй, уул уурхай, нийлүүлэлтийн сүлжээ болон эдийн засгийн урт хугацааны тогтвортой байдалтай нягт холбоотой ажээ. 

Эх сурвалж: Монголын бизнесийн зөвлөл