Архи, согтууруулах ундааг хууль бусаар үйлдвэрлэж, худалдан борлуулах гэж байсан үйлдлийг цагдаагийн байгууллага илрүүлж, таслан зогсоолоо.

Тодруулбал энэ оны 02 дугаар сарын 05-ны өдөр Сонгинохайрхан дүүргийн нутаг дэвсгэрт үйл ажиллагаа явуулж байсан нэр бүхий аж ахуйн нэгж байгууллага нь ус, ундаа үйлдвэрлэдэг нэрийдлээр тусгай зөвшөөрөлгүй хуурамч архи, согтууруулах ундааг их хэмжээгээр үйлдвэрлэж байсан үйлдлийг илрүүлж, таслан зогсоолоо.

Уг байгууллага нь хууль бусаар үйлдвэрлэсэн архи, согтууруулах ундааг онцгой албан татварын тэмдэггүйгээр хямд үнээр захын гэр хорооллын дэлгүүрүүдээр дамжуулан худалдан борлуулсан, мөн ОХУ, БНХАУ, Казахстан улсаас хуурамч архи согтууруулах ундааны зүйлийг улсын хилээр хууль бусаар оруулж ирэн хуурамч онцгой албан татварын тэмдэг нааж, бусдад худалдан борлуулж, мөнгө угаах гэмт хэрэг үйлдсэн байж болзошгүй гэх гэмт хэргийн шинжтэй үйлдлийг Эрүүгийн цагдаагийн албаны алба хаагчид шуурхай илрүүлж ажиллаа.

Иймд иргэд та бүхэн хямд үнэтэй, гарал үүсэл тодорхойгүй, хуурамч байж болзошгүй архи согтууруулах ундааг худалдан авч өөрийн болон бусдын амь нас, эрүүл мэндэд эрсдэл учруулахаас урьдчилан сэргийлэхийг анхааруулж цагдаагийн байгууллагаас анхааруулж байна.

Эх сурвалж: ЦЕГ