"Монгол Улсын хүн ам зүйн бодлого, асуудал шийдэл” сэдэвт нээлттэй хэлэлцүүлэг 14:00 цагт Төрийн ордны “Жанжин Д.Сүхбаатар” танхимд эхэллээ.

УИХ-ын гишүүн Д.Үүрийнтуяа:

"Миний бие УИХ-ын 5 гишүүнтэй хамтраад "Олон хүүхэд төрүүлж өсгөсөн эхийг урамшуулах тухай хууль"-д өөрчлөлт оруулах тухай хуулийн төслийг санаачилж өнгөрсөн хаврын чуулганаар УИХ-аар оруулж хэлэлцэх эсэх асуудал дэмжигдсэн.

Хуулийн төслийн хүрээнд нэлээн өргөн бүрэлдэхүүнтэй хэлэлцүүлгийг өнөөдөр хийж байна. Энэ онд МУ-ын хүн амзүйн бодлого, хүн амзүйн өсөлтөд нөлөөлж буй хүчин зүйл төрөлтийн нийлбэр коэффициентийн бууралт юунаас шалтгаалж байгааг мэргэжлийн эрдэмтэн судлаачид салбарын бодлого барьж байгаа яамдын төлөөлөл өргөн агуулгаар хэлэлцэж байна. 

Энэ хууль 1957 онд анх батлагдсан. 2024 оны өөрчлөлтөөр "нэгээс дээш насандаа нас барсан хүүхдүүдийг төрүүлж өсгөсөн хүүхдийн тоонд оруулж тооцоод" 0-1 насандаа эндсэн хүүхдүүдийг оруулаагүй орхисон. 

Мөн 0-1 насандаа байгаа хүүхдийг одон авах хүүхдийн тоонд оруулахгүй байна. Хууль санаачлагчийн хувьд энэ 2 заалтыг хасах өөрчлөлт оруулж байна.

Ингэснээр 4 үндсэн зорилгыг хэрэгжүүлнэ гэж үзэж байна.

1.Олон хүүхэд төрүүлсэн ээжүүдийн хөдөлмөрийг үнэлэхэд ялгавар тогтоохгүй байх

2. Хүүхдийн тоонд нас барсан хүүхдийг оруулах эсэхээс хамаараад одонгоо авч чадахгүй байгаа орхигдож байгаа ээжүүдийн асуудлыг шийдвэрлэнэ
3. Нэг нас хүрээгүй ч хүүхэд. Хүүхдийн эрхийг хамгаалъя.
4. Монгол улсын хүн амзүйн бодлогод тодорхой хэмжээгээр үр өгөөжөө өгөөд явж буй хуулиа цааш нь сайжруулаад явъя.

Одонтой ээжийн мөнгөнд болоод хүүхэд төрүүлж байна гэж огт харахгүй байна. Монгол Улсын иргэн болж улсын дугаар авсан л бол төрсөн гэж үзье. 

Өнгөрсөн оны судалгаагаар үзэхэд 1-р одон авах ээж 10154-өөр нэмэгдэнэ, 2-р одон авах ээжийн тоо 27140-өөр нэмэгдэнэ. Ингэснээр одонгийн мөнгө 7,5 тэрбум төгрөг эхний удаа гарна. Энэ бол өмнөх жилүүдийнх нөхөгдөж байгаа дүн бөгөөд цаашдаа жил тутамдаа тухайн жилд үүссэн нөхцөл л орно. Тиймээс энэ бол буураад явах юм. Санхүүгийн хувьд дарамт үүснэ гэж үзэхгүй байна.