“Элэг бүтэн Хөвсгөл” хөтөлбөрийн хүрээнд Хөвсгөл аймагт хавдрын тусламж үйлчилгээг сайжруулах, олон улсын жишигт нийцсэн эрүүл мэндийн сайн үйлчилгээ, чанартай оношилгоо, шилдэг мэс заслын эмч нарын ур чадварыг нутагшуулахыг зорьж байгаа юм.

Хөдөөгийн багуудаар хавдрын эрт илрүүлгийн баг ажиллуулж, 6000 орчим хүнд үзлэг оношилгоо хийжээ. Энэ ажил үргэлжлэх юм байна.

Ирэх намар аймгийн төв Мөрөн суманд Хавдрын эрт илрүүлгийн төв ажиллаж эхэлнэ. Барилгын ажил бараг 100 хувьд хүрчээ. Энэ төвийг байгуулах анхны санаачилгыг дурангийн эмч Ч.Болдбаатар гаргаж, барилгын ажлыг дуусгах хүртэл хамт ажилласан байна.

2020 оны байдлаар Хөвсгөл аймаг орон нутгийн хэмжээнд хорт хавдрын шинээр оношлогдсон нийт тохиолдлоор улсад гуравдугаарт оржээ. Нийт 270 тохиолдол оношилсон байна. Хорт хавдрын бүтцийг задлан авч үзвэл хоол боловсруулах эрхтэн тогтолцооны хавдар нийт тохиолдлын 60 гаруй хувийг эзэлжээ.

Улсын хэмжээнд хавдрын тусламж үйлчилгээг Улаанбаатарт төвлөрүүлдэг. Иймээс орон нутгийн хүмүүст эрүүл мэндийн тусламж үйлчилгээний хүртээмж сул, хорт хавдрын оношилгоо эмчилгээг оройтож авдаг. Мөн эдийн засгийн хувьд шаардлагагүй дагалдах зардал өндөр байгаа тул энэ төрлийн эмнэлгийн тусламж үйлчилгээг орон нутагт нэвтрүүлэх шаардлагатай. Хөвсгөл аймаг Хавдрын эрт илрүүлгийн төвтэй болсноор:

Иргэдийн эрүүл мэндийн боловсролыг дэмжих замаар хавдрын эрт илрүүлэг, урьдчилан сэргийлэх үзлэгт тогтмол хамрагдах дадал зуршлыг бий болгох.

•Эдийн засгийн ачаалалгүйгээр хавдрын нарийн мэргэжлийн тусламж үйлчилгээг харьяа орон нутгийн эмнэлэгт чирэгдэлгүй хүргэх
•Аймгийн нэгдсэн эмнэлгийн оношилгоо эмчилгээний чадамжийг сайжруулах
•Орон нутгийн эмч мэргэжилтнүүдэд хавдрын нарийн мэргэжлийн оношилгоо эмчилгээ үзүүлэх чадамжийг бий болгох, мэдлэг чадварыг нутагшуулах.
•Эрүүл мэндийн үйлчилгээнд Улаанбаатар руу урсах мөнгөн урсгалыг орон нутагт нь үлдээх зорилт тавьжээ.