Үндэсний эрх чөлөө, Тусгаар тогтнолоо сэргээн мандуулсны 112 жилийн ойг тохиолдуулан эх орныхоо хөгжил дэвшилд үнэтэй хувь нэмэр оруулж буй хүмүүст төрийн дээд одон, медалийг Ерөнхийлөгч У.Хүрэлсүх гардуулж байна.

Утга зохиолын хөгжлийн төлөө 55 жил тасралтгүй хөдөлмөрлөж, Монголын уран зохиолыг олон улсад сурталчлах эх хэл, өв соёлоо хамгаалах, үндэсний ёс заншлаа залуу үедээ өвлүүлэн уламжлахад зориулсан гавьяа зүтгэл, уран зохиол орчуулгын 40 гаруй бүтээл туурвин ард түмнээ соён гэгээрүүлэхэд оруулсан жинтэй хувь нэмэр болон байгаль дэлхийгээ хайрлан хамгаалах эх үйлсэд үнэтэй хувь нэмэр оруулж, сая модны суулгац тарьж ургуулсан нөр их хөдөлмөрийг нь өндрөөр үнэлж МУСГЗ, зохиолч Ч.Галсанд Монгол Улсын Хөдөлмөрийн баатар цол хүртээж, Сүхбаатарын одонгоор шагналаа.

Ширээний теннисний салбарт 60 гаруй жилийн хөдөлмөрөө зориулан улсын болон олон улсын чанартай олон тэмцээн, уралдаанд амжилттай оролцож, шинэ залуу тамирчдыг бэлтгэн гаргахад үнэтэй хувь нэмэр оруулж байгаа “Оч” клубийн багш, дасгалжуулагч ОУХМ Б.Отгонжаргал,

50 гаруй жилийн хөдөлмөрөө зориулж, уулын спортоор тасралтгүй хичээллэж, энэ спортоор дэлхийн болон Ази тивийн дээд амжилтуудыг шинэчлэн тогтоож, залуу уулчдыг бэлтгэх, Монгол уулчдаа дэлхийд таниулах, Монгол Улсын уулын спортыг хөгжүүлэх оруулсан хувь нэмрийг үнэлэн Б.Элбэгжаргал нарыг Монгол Улсын гавьяат тамирчин цолоор шагналаа.

Үйлчилгээний салбарт тасралтгүй 50 шахам жил хөдөлмөрлөж байгаа Монголын үсчин, гоо сайхны салбарын мэргэжлийн зөвлөлийн дарга Ц.Цогзолмааг Монгол Улсын үйлчилгээний гавьяат ажилтан цолоор шагнав.

Мөн эрхэлсэн ажилдаа эрдэм мэдлэг хүч чадлаа дайчлан ажиллаж өндөр амжилт гаргасан “Монголын тогооч нарын холбоо”-ны зөвлөх тогооч П.Цэрэнмягмар, нийслэлийн 208 дугаар цэцэрлэгийн эрхлэгч И.Өлзийсайхан нарыг Хөдөлмөрийн гавьяаны Улаан тугийн одонгоор шагналаа.