АНУ-ын тэргүүн хатагтай асан Жилл Байден нөхөр Жо Байденыг 2024 оны ерөнхийлөгчийн сонгуулийн мэтгэлцээний үеэр "Цус харваж байгаа юм биш биз" гэж бодсон тухайгаа ярьжээ. 

Тодруулбал 2024 оны ерөнхийлөгчийн сонгуулийн кампанит ажлын үеэр болсон мэтгэлцээнд Жо Байден Дональд Трамптай халз мэтгэлцсэн ч түүний сул үзүүлэлт ихээхэн шүүмжлэл дагуулсан юм.

Энэ тухай түүний гэргий Жилл "Би Жог тийм байдалтай байхыг хэзээ ч харж байгаагүй. Би маш айсан. Юу болсоныг ойлгоогүй. Бурхан минь, цус харваж байгаа юм биз дээ" гэж бодсон хэмээн ярив. 

Түүнчлэн Жилл Байден Жо Байдены карьерын туршид түүний дэргэж байж дэмжсэн тухайгаа ярьжээ. Түүнийг Байдены хамгийн нөлөө бүхий зөвлөхүүдийн нэг гэж үздэг.

Тус мэтгэлцээний дараа намынх нь гишүүд, хандивлагчид нь Байденыг нэрээ татахыг шаардаж эхэлсэн. 

Тухайн үед Байден 81 настай байсан бөгөөд сонгогчид түүний өндөр нас, биеийн байдал, ой санамж зэрэгт санаа зовж байсан юм. 

Мэтгэлцээний үеэр Жо Байдены хоолой сөөсөн байсан бөгөөд түүнийг өвдсөн хэмээн багийнхан нь тайлбарлаж байв. Мөн мэтгэлцээний дундуур үг хэлэхгүй удах, гацах зэргээр маш муу үзүүлэлттэй оролцсон. 

Удалгүй Жо Байден нэрээ татсан бөгөөд түүний оронд Ардчилсан намаас тухайн үеийн дэд ерөнхийлөгч байсан Камала Харрис дэвшин Трампад ялагдаж байв. 

Эх сурвалж: ВВС