Улаанбаатар хотын худалдааны танхимаас сэргээгдэх эрчим хүч, ногоон шийдлийн тухай ойлголтыг түгээхээр нийлүүлэгч болон худалдан авагч байгууллагуудыг холбосон уулзалтыг өнөөдөр зохион байгуулав. 

Энэ үеэр Улаанбаатар хотын танхимаас хэрэгжүүлэх “Цахилгаан тээврийн хэрэгслийн дэд бүтцийн хөтөлбөр”-ийн талаар тус танхимын гүйцэтгэх захирал Б.Хаш-Эрдэнэ танилцуулав. 

Энэ хөтөлбөрийн зорилго нь цахилгаан машинтай хэрэглэгчдэд шаардлагатай, хурдан цэнэглэх станцуудыг барих  юм. 

Ингэснээр байгальд ээлтэй, нүүрс хүчлийн хийн  ялгарал багасаж, 33 мянган янданг буулгасантай дүйх хэмжээний агаарын бохирдлыг багасгана. Хосолмол машинуудын батарейны хог хаягдлыг бууруулахад ч нөлөөтэй гэв. 

Цэнэглэгчийг жолооч нарын амархан хүрч очих цэгүүдэд буюу томоохон сүлжээ дэлгүүрийн дэргэд энэ онд байрлуулна. Нийт 80 станцыг хотын төвд болон захад тэнцүү  хуваарилахаар төлөвлөжээ. 

Нэг машиныг дунджаар 30-40 минутад түргэн цэнэглэгчээр цэнэглэнэ. 

Уулзалтад байгальд ээлтэй, ногоон технологийн салбарын төлөөллүүд, тус чиглэлд хөрөнгө оруулах сонирхолтой дотоод, гадаадын хөрөнгө оруулагчид оролцлоо. 

“Монхорус, “Энэржи повэр инвентэр”, “Смарт контракт”, “Би ай би дисковери ххк” компанийн төлөөлөл төсөл, бараа бүтээгдэхүүнүүдээ, “Хөгжлийн шийдэл” ТББ-ын гүйцэтгэх захирал Б.Хишигсүрэн хэрэгжүүлж буй төслөө, “ТОС холбоо”-ны тогтвортой байдлын удирдлагын мэргэжлийн зөвлөлөөс А.Энх-Эрдэнэ санхүүжилттэй холбоотой мэдээллүүдийг тус тус танилцууллаа.  

Б.Энэрэл