Ерөнхий сайд Н.Учралын танхимын бүрэлдэхүүнээс УИХ-ын гишүүд асуулт асууж байна.

УИХ-ын гишүүн Г.Очирбат танхимын бүх гишүүдээс хийх ажлын талаар, асуудлын талаар нэг бүрчлэн асуулт асуулаа. Хамгийн түрүүнд тэрбээр Ерөнхий сайдад хандан “Та сүүлийн гурван өдөр үнэн байх талаар их ярилаа. Танаас асууя. Энэ томилгоо яг үнэн байж чадсан уу” хэмээв.

Түүний асуултад Ерөнхий сайд Н.Учрал “Одоо хэрэгжиж байгаа хуулийн дагуу л танхимаа бүрдүүлсэн. Энэ бол манай кабинет. Энэ багаар үр дүнд хүрч чадна гэж тооцсон. Гадаад хямрал болж байгаа үед дотоод зөрчил байж болохгүй. Тиймээс энэ цаг үеийг давахад дотоод сахилга бат, хариуцлага маш чухал. Тэгэхээр энэ кабинет бие биенийхээ дутууг нөхөж, ажиллах бололцоотой, суралцаад байх шаардлагагүй ийм л туршлагатай баг гэж үзэж байна.

Миний итгэл үнэмшил, Үндсэн хуулиар олгосон эрх энэ багаар үр дүнд хүрнэ гэж тооцож кабинетээ бүрдүүлсэн. Ажил эхлэхээс өмнө гайхамшиг бүтээнэ гэж гоё юм яриад яах вэ. Ажилдаа шуурхай орно. Бид үнэнтэй нүүр тулах болсон. Зугтаж олон жил явлаа. Үнэнтэй тулах хэрэгтэй. Бид дэлхийн цаг төр ийм байхад үнэнтэй нүүр тулна. Үнэнээс айхгүй, нуухгүй. Түүнийг нуух гэж оролдохгүй. Болж байгааг нь болж байна, болохгүйг нь болохгүй байна гээд хамтдаа салхи шуургыг давна.

Хоосон улстөржиж, попрохгүй. Төрийн өмчит компанийн зардал бууруулах, хэмнэх талаар хийсэн ажлууд бий, зөвхөн хөрөнгө оруулалтыг эрэмблэх чиглэлээр хэмнэлт хийнэ. 5.3 тэрбумыг хэмнэнэ, KPI-р үнэлдэг болно. Авлига бусад шударга зүйлээс урьдчилан сэргийлэх хариу арга хэмжээг шат дараатай авна. Дуусдаггүй олон яриаг дуусгахын төлөө ажиллана” гэв.