УИХ-ын гишүүн Х.Булгантуяа мэдээлэл өглөө. 

-Манай нам сөрөг хүчингүй ажиллаад сурчихсан, яг тэр арга барилаараа одоо ч ажиллах гээд байна. Тэр сэтгэлзүй, арга барилаараа 5 намын төлөөлөлтэй парламентыг удирдаж авч явна гэдэг хэцүү. Цаашид 5 магадгүй үүнээс ч олон намуудтай парламент байх нь тодорхой байна.

АН-ынхан намчирхдаггүй, УИХ-ын үйл ажиллагааг авч явдаг, микрофон хуваарилж спикерийн ажлыг хийх ёстой гэсэн шаардлагыг тавьж байна. Би үүнийг зөв гэж бодож байна. 

-Таныг төрийн эрхийг хууль бусаар авахыг завдсан гэж ТЕГ шалгаж байгаа. Энэ хэрэг ямар шатандаа яваа вэ?
-“Төрийн эрх барих дээд байгууллагын” гэж байгаа, Эрүүгийн хуульд. УИХ-ын дэд дарга хүн би УИХ-ынхаа эрхийг хууль бусаар авах гэсэн гэдэг нь Д.Амарбаясгаланг унагах гэсэн гэж хэлээд байгаа юм уу? Өөрөөсөө гадна 125 гишүүний эрхийг би авчихсан юм уу? Төрийн эрх нийт ард түмэнд байдаг. Парламентын хуралдаан даргалсны төлөө над дээр төрийн эрх барих дээд байгууллагын эрхийг хууль бусаар авах гэсэн гэж эрүүгийн хэрэг үүсгэсэн. Нам дотор талцал хуваагдал байдаг ч гэлээ хууль хүчний байгууллагуудыг татан оролцуулж, хүмүүсийг эрүүгийн гэмт хэрэгтэн болгоно гэдэг бол шинэ цагийн хэлмэгдүүлэлт. Ардчилсан улсад арай ч ийм байдаггүй. Хийх ажил их байхад манай МАН-ын зодоон арай дэндэж байна. Өнгөрсөн өвөл арайхийж улаан, ногоон лаазаа өргөж байж төсвөө л баталлаа. Түүнээс илүү гарсан зүйл байхгүй байна. Нэг даргынхаа асуудлаас болоод нийт ард түмэнд тулгамдсан асуудлыг битгий гацаагаасай.

-Таныг МАН-аас хөөсөн үү?
-Албан ёсоор шийдвэр гараагүй, надад мэдэгдсэн зүйл алга байна. Хяналтын ерөнхий хороо эцсийн шийдвэрийг гаргах субьект.