Баянзүрх, Сүхбаатар, Чингэлтэй дүүргийн эрүүгийн анхан шатны тойргийн шүүхэд эрх мэдэл, албан тушаалын хэрэг үйлдсэн гэх З.Энхболд, Б.Энх-Амгалан нарт холбогдох хэргийн шүүх хурал болж дууслаа.

Шүүхээс Б.Энх-Амгалан, З.Энхболд нар хорих ял оноов. Тодруулбал: 

• Б.Энх-Амгаланг Эрүүгийн хуулийн 22.1.3 дахь зүйлд зааснаар Засгийн газрын гишүүн, Зам тээврийн хөгжлийн сайдаар буюу улстөрд нөлөө бүхий этгээдээр ажиллаж байх хугацаанд Ерөнхийлөгчийн Тамгын газрын даргаар буюу нийтийн албан тушаалтнаар ажиллаж байсан З.Энхболдод нөлөөлсний улмаас үргэлжилсэн үйлдлээр бүрэн эрх, албан тушаалын байдлаа урвуулан ашиглаж бусдад давуу байдал бий болгох гэмт хэрэгт гүйцэтгэгчээр хамтран оролцсон гэм буруутайд,
• З.Энхболдыг Эрүүгийн хуулийн 22.1.3 дахь зүйлд зааснаар Ерөнхийлөгчийн Тамгын газрын даргаар буюу нийтийн албан тушаалтнаар ажиллаж байхдаа улстөрд нөлөө бүхий этгээд болох Б.Энх-Амгаланд хууль бусаар нөлөөлөн түүнийг үргэлжилсэн үйлдлээр албан үүрэг, бүрэн эрх, албан тушаалын байдлаа урвуулан ашиглаж бусдад давуу байдал бий болгох гэмт хэргийг үйлдэхэд зориуд хүргэж хатгагчаар хамтран оролцсон гэмт хэргийг үйлдсэн гэм буруутайд тооцов.

Улмаар:

• Б.Энх-Амгаланд Эрүүгийн хуулийн 22.1.3 дахь зүйлд зааснаар нийтийн албанд томилогдох эрхийг таван жилийн хугацаагаар хасаж, 2 жилийн хугацаагаар хорих ял,
• З.Энхболдод Эрүүгийн хуулийн 22.1.3 дахь зүйлд зааснаар нийтийн албанд томилогдох эрхийг таван жилийн хугацаагаар хасаж, 2 жилийн хугацаагаар хорих ял тус тус оноолоо. Тэднийг өнөөдрөөс эхлэн хорино гэдгийг шүүгч танилцууллаа. 

Хэрэг шүүхэд шилжээд гурван жил өнгөрч буй бөгөөд анхан шатны шүүхээр гурав дахь удаагаа хэлэлцлээ. Хэргийн дэлгэрэнгүйг ЭНД-ээс унших боломжтой.