Архангай аймгийн Цэнхэр сумын харьяат Улсын гарди М.Бадарч энэ сарын 5-нд болох барилгын салбар үүсэж, хөгжсөний 100 жилийн ойн барилдаанд зодоглохоор болжээ.

Энэ тухай тэрбээр "Үндэсний бөхийн холбооны тэргүүнээс би барилдаж болох уу гэхэд "Допингийн холбооноос тодруулаарай" гэсэн. Допингийн холбоо "Өөрөө мэд" гэдэг хариулт өгсөн. Тиймээс энэ сарын 5-нд болох Барилгын салбар үүсэж, хөгжсөний 100 жилийн ойн барилдаанд очно" гэлээ. 

2023 оны баяр наадмын Хүчит бөхийн барилдаанд улсын гарди М.Бадарч түрүүлж, улсын арслан цол хүртсэн. Гэвч түүний сорьцоос метенолон гэх бүх цаг үед хориотой допингийн төрлийн бодис илэрсэн тул тэрээр В сорьцоо шинжлүүлэх хүсэлт өгч, өөрийн биеэр хяналт тавихаар БНСУ явсан билээ. Улмаар шинжилгээний В сорьцын хариу албан ёсоор гарч, допинг хэрэглэсэн нь баталгаажсан юм. 

М.Бадарчийн барилдах эрхийг 4 жилээр хасаж, 2027 оны долоодугаар сард сэргээх шийтгэл оногдуулсан билээ.