Өмнөговь аймгийн Цогтцэций суманд өнөөдөр Тавантолгой-Гашуунсухайт чиглэлийн хүнд даацын тусгай зориулалтын авто замын эхний 100 км хэсгийг ашиглалтад орууллаа.

Тус авто зам нь нийт 240 км урт, 14.5 метр өргөн, 7.5 метр зорчих хэсэгтэй бөгөөд уул уурхайн бүтээгдэхүүн тээвэрлэх зориулалттай, 20-24 тонн хүртэлх ачаалал даах хүчин чадалтай хүнд даацын зам юм.

Тавантолгой-Гашуунсухайт чиглэлийн авто замын төслийг Монгол Улсын Их Хурлын 2018 оны 73 дугаар тогтоол, Засгийн газрын холбогдох шийдвэрийн дагуу хэрэгжүүлж эхэлсэн. Улмаар 2019 оны гуравдугаар сарын 29-нд “Тал нутгийн хөгжлийн зам” ХХК-тай зураг төсөл боловсруулах, барих, ашиглах, шилжүүлэх концессын гэрээ байгуулж, замын барилгын ажлыг 2020 оны зургаадугаар сард эхлүүлжээ.

Гэвч цар тахал, геополитикийн нөхцөл байдал, барилгын материал, шатахуун болон тээврийн зардлын өсөлт, нийлүүлэлтийн хүндрэл зэрэг шалтгаанаар төслийн хэрэгжилт удааширсан байна. Үүний улмаас Засгийн газар, Зам, тээврийн яам, орон нутгийн удирдлага, концесс эзэмшигч болон гүйцэтгэгч компаниуд хамтран төслийн ажлыг эрчимжүүлж, эхний 100 км замыг ашиглалтад оруулж байгаа аж.

Үлдсэн хэсгийн барилгын ажлыг эрчимжүүлж, концессын гэрээний нийт хугацааг өөрчлөхгүйгээр 2026 оны есдүгээр сард багтаан замыг бүрэн ашиглалтад оруулах чиглэлийг Засгийн газар болон Зам, тээврийн яамнаас өгсөн байна.

Эх сурвалж: Зам, тээврийн яам