-Улаанбадрах суманд үхсэн малыг нохой, шувуу ч идэхгүй байна-

Дорноговь аймгийн Улаанбадрах сумын иргэд ураны уурхайг эсэргүүцэж байна.

Тус суманд үүсээд буй асуудлаар олон удаагийн хяналт шинжилгээ хийгдэн  цацрагийн хэмжээ хэвийн хэмжээнд байна гэж гарсан.

Гэвч нутгийн иргэдийн малд гарч буй гажиг төрөлт, зүй бус үхэл зэрэгтэй ТББ, хөдөлгөөнүүд нэгдэн өнгөрсөн долоо хоногт бодит байдалтай танилцаж, хэмжилтүүдийг хийгээд иржээ.

"Кожеговь" ХХК-ний үйл ажиллагаа явуулж буй газруудад олон улсад хүлээн зөвшөөрөгдсөн багажаар хийсэн бөгөөд тухайн бүсэд цацрагийн хэмжээ манай улсад байх ёстой хэмжээнээс ес дахин их гарсан байна.

Энэ өндөр цацрагтай хэсэгт тугалын мөр хаа сайгүй байснаас гадна ямар нэг хашаа, хорио цээр, таних тэмдэг байгаагүй талаар “Голомт” ТББ-ын тэргүүн, лазерийн физикч, доктор Г.Ариунболд хэлж байлаа.

Мөн энэ талаар Улаанбадрах сум, Аргалант багт ажиллаад ирсэн “Цагаан хас” ТББ-ын тэргүүн Ж.Эрдэнэзаяа хэлэхдээ,

-Ерөнхий сайд Н.Алтанхуяг ажлын хэсэг байгуулж 90 сая төгрөг зарцуулан байж “гал унтраасан” дүгнэлт гаргасан. Энэ дүгнэлтийг худлаа гэдгийг бид хэмжилтээрээ баталсан.

Н.Алтанхуяг аа болиорой, сайхан мэдээрэй ард түмнийхээ амийг нэхнэ шүү, Ерөнхийлөгч Ц.Элбэгдорж оо цөмийн эсрэг тэмцэнэ гэж удаа дараа мэдэгдээд байсан яасан бэ, хэлсэндээ хүрээч ээ, та бүхэн энэ аюултай хууль тогтоомжуудаа эргэн харж, засаж залруулаач ээ. Дараа харамсаад ч хожимдоно шүү.

Монголын ард түмний амь, нас, амьдрал хэн нэгэн гадаад хөрөнгөтний гарт үрэгдэхийг зөвшөөрөхгүй. Өнөөдөр мал үхнэ маргааш монгол хүн үхнэ гэдгийг анхаараарай гэсэн юм.

Дорноговь аймгийн Улаанбадрах сумын нутагт хийсэн хэмжилтүүд хийгээд нутгийн иргэдийн санал бодлыг дараах бичлэгээс үзнэ үү.



А.Сүрэн