Засгийн газрын ээлжит хуралдаан эхэлж дараах асуудлыг хэлэлцэж байна. Үүнд,

• Уул уурхайн бүтээгдэхүүний экспорт, валютын нөөцийн нөхцөл байдлын талаар
• Атрын IV аяны талаар
• Стандартчилал, техникийн зохицуулалт, тохирлын үнэлгээний итгэмжлэлийн тухай хуулийн шинэчилсэн найруулгын төсөл,
• Байгаль орчинд нөлөөлөх байдлын үнэлгээний тухай хуульд нэмэлт, өөрчлөлт оруулах тухай хуулийн төсөл,
• Зөвшөөрөл олгох үйл ажиллагааг хөнгөвчлөх, цахим хэлбэрт шилжүүлэх, холбогдох захиргааны хэм хэмжээний актуудыг хуульд нийцүүлэх чиглэлээр авч хэрэгжүүлсэн арга хэмжээний талаар зэрэг 21 асуудал хэлэлцэхээр төлөвлөжээ. 

Мөн нэмэлтээр 6 асуудал танилцуулна гэж ЗГХМОНХГ-аас мэдээллээ.

Засгийн газрын хурлаас гарсан шийдвэрийг танилцуулж байна.

Засгийн газрын хэрэг эрхлэх газрын дарга Н.Учрал "Шадар сайд С.Амарсайханаар ахлуулсан стандартын бие даасан эрх зүйн орчныг боловсронгуй болгох ажлын хэсэг хоёр жилийн хугацаанд ажилласан. Өнөөдрийн хурлаар Стандартчилал, техникийн зохицуулалт, тохирлын үнэлгээний итгэмжлэлийн тухай хуулийг өргөн мэдүүлэхээр шийдвэрлэлээ.

Монгол Улсын хэмжээнд 6733 стандарт мөрдөгдөж байгаа ч иргэд, байгууллагууд тэр бүрийг төдийлөн мөрддөггүй. Мөн олон улс, бүс нутгийн хэмжээнд мөрдөгдөж буй стандартыг бид шууд авч хэрэгжүүлэх хууль эрх зүйн орчин бүрдээгүй байна.

Энэ хуулийг өргөн мэдүүлснээр зөвшөөрөл давсан журмууд цуцлагдах, цаашид зөвшөөрөл нэмэхгүй байхад стандартаа дагаад явцын хяналтаа сайжруулах ажил руу орно. Зөвхөн олгох процесс дээр хүнд суртал үүсгэх биш үйл ажиллагаа эрхэлж байгаа явцад нь хяналт тавихад олон улсын стандартыг дагах нөхцөлийг бүрдүүлнэ.

2022 оны байдлаар барилга, эрүүл мэнд, хүнсний салбарт 2000 гаруй стандарт мөрдөгдөж байсан. Үзлэг хийхэд 782 нь л олон улсад нийцэж байсан. Улмаар 180-ыг нь цуцалсан. 

Иргэддээ хүнд сурталгүй, эрүүл аюулгүй үйлчилгээ үзүүлэх бололцоо бүрдэнэ. Мөн хаврын чуулганд Зөвшөөрөл, мэдэгдлийн хуулийг өргөн мэдүүлнэ. Энэ хууль гарснаар зөвшөөрлийн тоо буурна. Өөрөөр хэлбэл Зөвшөөрлийн тухай хуулийг Зөвшөөрөл, мэдэгдлийн тухай хууль болгох алхам хийж байна" гэв.