"Амлалт нэхэх, ард түмний хөдөлгөөн" төв талбайн дөрвөн талд "Мөнгөө авъя" хэмээн лоозон барин зогсож, хүмүүсийг нэгдэхийг өчигдөр уриаллаа.

Улс орон даяар өндөржүүлсэн бэлэн байдал зарлаад байгаа энэ үед тэд олон хүн цуглуулж, замын хөдөлгөөнд саад болохгүйгээр тайван замаар тэмцэж байгаа аж. Тус хөдөлгөөний зорилго нь парламентад сууж буй эрхэм төрийн түшээдийн амлалтыг биелүүлэхэд чиглэгдэж байна. Тодруулбал, МАХН, Ардчилсан нам хоёрын сонгуулиар ард түмэндээ амласан 1.5 сая төгрөгийг тэд яаралтай өгөх ёстой гэж үзэж байна.

Тус хөдөлгөөний ерөнхий зохицуулагч Г. Уянгатай уулзлаа.

-Цаашид ямар арга хэмжээ авч ажиллах вэ?
-Биднийг дэмжиж байгаа олон хүн байна. Тиймээс цаашид үйл ажиллагаагаа өргөжүүлэн ажиллах болно. Тухайлбал, иргэд сонгогчдоос тухайн тойргоос сонгогдсон УИХ-ын гишүүд ямар амлалт өгч байсныг баримтаар цуглуулж байгаа. Түүнийгээ биелүүлэхийг бид шаардах болно. Хорио цээрийн дэглэм тавигдахаар хөдөлгөөнийхөө байрыг олон нийтэд зарлахаар төлөвлөж байна. Бидний өнөөдрийн хийж буй ажил бол жагсаал, цуглаан биш, ямар нэгэн хууль зөрчсөн зүйл байхгүй. Аль болох хямд төсрөөр хүмүүст дуу хоолойгоо хүргэхийг зорьж байна. Олон нийтийн мэдээллийн хэрэгслээр мэдээлэл цацахад үнэндээ их өртөг өндөртэй юм. Нэг нэвтрүүлэгт ороход л 500 мянгаас нэг сая төгрөг байх жишээтэй.

-Парламентийн бүрэн эрхийн хугацаанд эх баригч хоёр нам амласан мөнгөө өгч чадахгүй гэдгээ хүлээн зөвшөөрчхөөд байгаа юм биш үү. Энэ зүгээр л сонгуулийн шоу байсан гэх хүмүүс ч байна?
-Өгье гэвэл боломж байгаа. Тэд боломжтой учраас амласан. Судлаад өгөх боломжтой гэж үзээд ийм амлалт өгсөн. Одоо гагцхүү ард түмэн мөнгөө авах л үлдсэн. Боломжтой, боломжгүйн тухай яриа хэтэрхий оройтсон.

Г.Долгорсүрэн