Монгол Улсын Засгийн газар, Японы олон улсын хамтын ажиллагааны байгууллага хооронд байгуулах “Улаанбаатар хотын олон улсын шинэ нисэх онгоцны буудал барих төслийн нэмэлт хэлэлцээр”-ийн төслийг өнөөдрийн Төсвийн байнгын хорооны хуралдаанаар хэлэлцлээ.

Улаанбаатар хотын олон улсын шинэ нисэх онгоцны буудал барихад нийт 560 сая ам.доллар шаардлагатай. Үүний 245 сая ам.доллар буюу 28.8 тэрбум иенийг одоогийн байдлаар аваад зарцуулчихсан. Үлдсэн 360 сая ам.долларын санхүүжилтийг Японы олон улсын хамтын ажиллагааны байгууллагаас авах хүсэлтийг манай талаас тавьжээ.

Энэ зээлийг нэмж авснаар өрийн хязгаар өсөх юм байна. Иймд “Өрийн удирдлагын тухай хууль”-ийг яаралтай батлах шаардлага гарч байна.

Ирэх онд манай улсад АСЕМ-ийн дээд хэмжээний уулзалт болно. Үүнээс өмнө шинэ нисэх буудлын эхний хэсгийг ашиглалтад оруулах боломж байгааг УИХ-ын гишүүн Д.Ганхуяг лавлаж байв. Шинэ нисэх онгоцны буудлын барилгын ажлыг 2017 оны нэгдүгээр сарын 7-нд барьж дуусгана гэж төслийн захирал Н.Энхбатын хэллээ.

Барилгын ажил 2013 оны зургаадугаар сард эхэлсэн. Дашрамд хэлэхэд манай улс энэ төслийг хэрэгжүүлэхэд ихээхэн хугацаа алдсан бөгөөд эхний хоёр тендер будлиантан, 3 дахь удаа тендер зарлахад хүрсэн юм. 

Төсвийн байнгын хорооны хуралдаанаар өнөөдөр хэлэлцэн, дэмжлэг авсан дээрх хэлэлцээрийг Аюулгүй байдал, гадаад бодлогын байнгын хороонд шилжүүлэх аж.