Украины Ерөнхийлөгч дөрөвдүгээр сарын нэгний тоглоом шоглоомын золиос болжээ. Виктор Ющенкогийн өөрийнх нь хэлснээс үзвэл, лхагва гарагийн өглөө гэргий нь өөрөөр нь даажигнасан байна. Катерина Ющенко бие шалтгаантай болчихсон шиг байна хэмээн нөхөртөө хэлэхэд, Ерөнхийлөгч  үнэмшжээ гэж Интернэтийн "Украньюс" сайтад мэдээлсэн байна.

Ющенко Украины Полтав мужийн Миргород хотод очихдоо сэтгүүлчдэд энэ тухай ярьжээ. "Өглөө үүрээр тэр над дээр хүрч ирээд, манайд нэг юм болох нь гэдэг байна. Цааш нь би тайлбарлаад яахав... Тэгэх юм хэмээн би нэг их бодож байгаагүйг та нар ойлгох биз. Би баяртай байсан ч, энэ үг намайг бүр балмагдуулчихсан. Би бүр яах учраа олоогүй"  гэж Ерөнхийлөгч хүлээн зөвшөөрчээ.

Удалгүй Катерина Ющенко чамаар тоглосон юмаа хөө гэж нөхөртөө хэлсэн байна. Хэрвээ Украины Ерөнхийлөгчийн гэргийн хэлсэн үг тоглоом шоглоом биш байсан бол, тэднийх зургаан хүүхэдтэй болох байжээ.

Я.Сүхбаатар