УИХ дахь АН-ын бүлгийн гишүүн Р.Сэддорж өнөөдөр /2026.05.21/ мэдээлэл хийлээ.

Р.Сэддорж, Зургаа, долоо настай хүүхдээ сургуульд сургахад малчин  гэр бүлүүдийн хувьд хүндрэл үүсэж байна. Монгол Улс 240 мянган мал бүхий иргэдтэй, 160 мянган малчин өрхтэй. Малчин өрхтэй айлуудын хувьд 6-7 настай хүүхдээ сургуульд сургахын тулд эхнэр, нөхрийн нэг нь сумын төвд амьдарч хүүхдээ харах шаардлага үүсдэг. Сумын сургуулийн дотуур байр байгаад ч тэнд 6-7-той хүүхэд бие даан амьдрах боломжгүй.

Зарим аймагт заавал цэцэрлэгт явсан хүүхдийг 1-р ангид авна гэж журам байна. Тэгвэл эхнэр, нөхрийн нэг нь хүүхдийнхээ таван настайд сумын төв рүү орох болдог. Ингэснээр гэр бүл салах, малчин өрх байхгүй болох, хөдөө нутаг эзгүйрэх сөрөг үр дагаврууд гарч байна.

Хүүхэд эцэг, эхтэйгээ хамт, хайр халамжид нь байснаараа сайн хүн болж төлөвшинэ. Тиймээс ЕБС-ийн 1-2-р ангийн сурагчид заавал сургуульд суух биш, малчин өрхийн хүүхэд гэрээсээ хичээл үзэх сонголттой болгоё гэсэн зохицуулалт бүхий хуулийн төслийг санаачилж, хэлэлцүүлэг өрнүүлж байна. Энэ бол Монгол Улсын тусгаар тогтнол, үндэсний өв соёлоо тээж яваа малчин иргэддээ төрөөс анхаарч буй бодлогын нэг хэлбэр юм.   

Ийм сонголтыг өгснөөр монгол хүүхдүүд ахуй соёлтойгоо зэрэгцүүлэн орчин үеийн боловсрол эзэмшиж, эх орноо хөгжүүлэх ирээдүйн сэхээтнүүд төрнө. Монгол бол ядуу орон биш, монголчууд учраа л олохгүй байна.

Жишээ нь, АНУ-д онлайн болон танхимын хосолсон сургалтыг хүлээн зөвшөөрдөг. АНУ-д дунд сургуулиудад зэвсэгт халдлага их гардаг учир 3.4 сая хүүхэд зайнаас цахимаар амжилттай суралцаж байна. Бид энэ жишгийг нэвтрүүлэх хэрэгтэй. Малчин өрхүүд дунд интернэтгүй айл гэж байхгүй. Малчин иргэд энэ асуудлыг хөндөж, ярьж байна. АН-ын бүлгийн хурлаар энэ асуудлыг ярилцаж, гишүүд дэмжиж саналаа хэлсэн.

“Хүүхдэд монгол хэлээрээ сайн ярьж чадахаа больж байна. Тиймээс хэл зүгшрүүлэх сургалт явуулах шаардлагатай” гэж Боловсролын сайд ярилаа. Энэ бол гунигтай мэдээ. Хүүхдүүд англи хэл дээр хүүхэлдэйн кино, ютүб үзсээр англиар хэлд орж байна. Тиймээс Улсын төсвөөс хөрөнгө гаргаж, Монголын түүх, уламжлал, соёлыг таниулсан монгол контентыг уран бүтээлчдээр хийлгэх хэрэгтэй байна гэв.