АНУ-ын ерөнхийлөгч Дональд Трамп бямба гарагт Ираны талыг Ормузын хоолойг 48 цагийн дотор нээхгүй бол тус улсын цахилгаан станцуудыг бөмбөгдөнө хэмээн сүрдүүлсэн. 

Тэгвэл тэрбээр даваа гарагт энэ хугацааг тав хоногоор хойшлуулж байгаагаа мэдэгджээ.

Трамп ийм шийдвэр гаргасан шалтгаанаа Ираны талтай хийсэн үр дүнтэй яриа хэлэлцээтэй холбоотой хэмээн тайлбарласан. 

Гэхдээ Ираны парламентын дарга Трампын хэлээд буй яриа хэлэлцээ болоогүй хэмээн үгүйсгэсэн юм. 

Түүнийг хуурамч мэдээ цацаж, газрын тосны зах зээлийг манипуляц хийхийг оролдож байна хэмээн шүүмжилсэн байна. 

Учир нь Трамп ийнхүү мэдэгдсэний дараа хувьцааны ханш өсөж, газрын тосны үнэ нэг баррель нь 100 ам.доллароос бууж, огцом унасан юм. 

Трамп өөрийн тусгай элч Стив Уиткофф болон хүргэн Жаред Кушнер нар ням гарагт Ираны албан тушаалтнуудтай ярилцсан ба энэ яриа даваа гарагт үргэлжилнэ гэсэн мэдээлэл өгчээ. 

Тэрбээр Ираны хэн гэдэг албан тушаалтантай ярилцсанаа дэлгэрэнгүй мэдээлээгүй ч "Миний ойлгож байгаагаар энэ хүн бол Иранд хамгийн их хүндлэгдсэн удирдагч нь" гэсэн байна. 

Ираны элит хувьсгалт гвардаас АНУ-ын баазууд руу шинэ довтолгоо эхлүүлж буйгаа мэдэгдээд Трампын мэдэгдлийг "ямар ч нөлөөгүй сэтгэл зүйн ажиллагаа" хэмээн тодорхойлжээ.  

Эх сурвалж: Reuters