УИХ дахь ХҮН намын зөвлөл ээлжит хурлаараа хоёр асуудал хэлэлцжээ. Нэгдүгээрт Монгол Улсын 2026 оны улсын төсвийн гүйцэтгэл болон Замын хөдөлгөөний аюулгүй байдлын тухай хуульд нэмэлт өөрчлөлт оруулах тухай хуулийн төслийн танилцуулгыг сонссон байна.

Энэ талаар УИХ-ын гишүүн, ХҮН Намын зөвлөлийн дарга П.Ганзориг танилцуулахдаа "2026 оны нэгдүгээр улирлын байдлаар төсвийн нэгдсэн орлого 870 орчим тэрбум төгрөгөөр тасалдсан. Төсвийн тэнцэл 1.4 их наядын алдагдалтай байна. 

Гадаад нөхцөл байдлаас хамааран түлш, өргөн хэрэглээний барааны үнэ өсөж байна. ААН, өрхүүдэд дарамт ирж байна. Зөвхөн мах гэхэд 50 гаруй хувиар өссөн. 

ААН, иргэдийн орлогыг хамгаалах төсвийн бодлого дутагдаж байна. Нэгдүгээрт татварын багц хуулийг Засгийн газраас оруулж ирэх шаардлагатай байгаа гэдэгт санал нэгдсэн. 2025 оны жилийн эцсийн байдлаар ААН-үүдийн улсад төлөх нийт татварын өр 3.2 их наяд төгрөгт хүрчээ. 

Төрөөс ААН-ийг дэмжих татварын бодлого хэрэгжихгүй хоёр жил өнгөрлөө. Шулуухан хэлэхэд өмнөх Засгийн газрууд ААН-үүдийг шилний цаанаас чихэр долоолгож байгаа юм шиг л явж ирсэн. Иймд нэн яаралтай татварын багц хуулийг оруулж ирэн баталж, намраас хөнгөлөлтүүд нь хэрэгжээд явах хэрэгтэй байна. 

Энэ багц хууль батлагдсанаар НАӨТ-ын буцаан олголтыг гэхэд л амьжиргааны доод түвшин буюу 492 мянга хүртэл 100 хувь буцааж олгодог байх зохицуулалтууд бий. Мөн ААН-үүдийн орлогын албан татварыг үе шаттай бууруулахаар төлөвлөсөн. 

ХХОАТ-ыг хөдөлмөрийн хөлсний доод хэмжээнд хүртэлх дүнд 100 хувь чөлөөлөх шаардлагатай гэсэн байр суурийг тавьж байна. Нийт айл өрхийн 90 орчим хувь нь зээлтэй байна" гэсэн мэдээллийг өглөө.