Монголын харилцаа холбоо, мэдээллийн технологийн салбарын шинэ чиг хандлага, дижитал шилжилт, хиймэл оюун ухаан болон инновацын талаар хэлэлцэх mobiCONNECT 2026 олон улсын чуулган өнөөдөр буюу есдүгээр сарын 21-нд Улаанбаатар хотноо,  Шангрилагийн хурлын танхимд болж байна.

Мобиком группээс зохион байгуулж буй тус арга хэмжээ нь энэ удаад компанийн 30 жилийн ойтой давхцаж байгаагаараа онцлог.

Арга хэмжээ Шангри-Лагийн хурлын танхимд 09:30-21:00 цагийн хооронд:

• “Cybersecurity in Digital Era”,
• “Next-Gen Connectivity & Digital Transformation”,
• “AI Powered Digital Future” гэсэн гурван үндсэн хөтөлбөрийн хүрээнд үргэлжилнэ.

Арга хэмжээний эхлэл хэсэгт цахим эрин үеийн кибер аюулгүй байдлыг онцолж, орчин үеийн кибер эрсдэл, Монгол дахь кибер аюулгүй байдлын чиг хандлага, цахим гэмт хэрэг, санхүүгийн салбарын кибер аюулгүй байдлын талаар хэлэлцэнэ. Мөн төр, хувийн хэвшил болон бусад салбарын хамтын ажиллагаагаар Монгол Улсын дижитал орчны тэсвэртэй байдлыг хэрхэн бэхжүүлэх талаар панел хэлэлцүүлэг зохион байгуулах юм.

Харин хиймэл оюун ухаанд суурилсан дижитал ирээдүй, дараагийн үеийн холболт, дижитал шилжилт зэрэг нь тус конференцийн гол технологийн сэдвүүдийн нэг байх юм. Хөтөлбөрт KDDI, Huawei, GSMA, Amazon Web Services, Talkdesk, CrowdStrike зэрэг олон улсын технологийн байгууллагуудын төлөөлөл, Монголын төр, хувийн хэвшлийн удирдлагууд оролцохоор бүртгэгджээ.

Арга хэмжээний үеэр Мобикомын “TelCo to TechCo” буюу уламжлалт харилцаа холбооны компаниас технологийн компанид шилжих стратегийн зураглал ба “30 Years of Connecting Mongolia, The Next 30 Years of Empowering Mongolia” агуулгыг танилцуулна.

mobiCONNECT 2026-ийн нээлтэд Мобиком корпорацийн Гүйцэтгэх захирал Ясүхиро Очи, KDDI корпорацийн Ерөнхийлөгч бөгөөд Төлөөлөн удирдах зөвлөлийн гишүүн Хиромичи Мацуда, Ньюком группийн Стратегийн хорооны гишүүн Р.Арвинцогт нар оролцоно.

1996 онд байгуулагдсан Мобиком корпораци өдгөө үүрэн холбооноос гадна өндөр хурдны интернет, сансрын холбоо, сүлжээний дэд бүтэц, дата төв, цахим төлбөрийн шийдэл, контент болон дижитал үйлчилгээг хамарсан технологийн экосистем болгон өргөжсөн билээ. Тус групп өөрийн мэдээллээр IoT, AI, 5G зэрэг технологийг Монголд нутагшуулж байна.

Ийнхүү mobiCONNECT 2026 нь Мобикомын 30 жилийн түүхийг эргэн харахаас гадна хиймэл оюун ухаан, дижитал шилжилт, кибер аюулгүй байдал, шинэ үеийн холболт болон дижитал дэд бүтцийн ирээдүйн талаар салбар хоорондын түвшинд хэлэлцэх арга хэмжээ болж байна.

"mobiCONNECT 2026" арга хэмжээний талаарх дэлгэрэнгүй мэдээллийг ЭНД дарж хүлээн авах боломжтой.