Засгийн газрын тогтоолын дагуу Тавантолгойн ордод хөрөнгө оруулж, хамтран ажиллах хөрөнгө оруулагчийг сонгон шалгаруулах болсон. Энэ хүрээнд уралдаант шалгаруулалтын урилгыг урьдчилсан шалгаруулалтын хураангуй жагсаалтад үлдсэн зургаан оролцогчид 2014 оны есдүгээр сарын 1-нд илгээсэн юм.

Тавантолгойн ордод хөрөнгө оруулж, хамтран ажиллах хөрөнгө оруулагчийг сонгон шалгаруулах Ажлын хэсэг компаниудын саналыг өнгөрсөн даваа гаригт хүлээн авч дуусчээ. Дараах компаниуд саналаа ирүүлсэн байна.

• “Чайна Шенхуа энержи”,
• “Сумитомо корпорац”
• “Энержи ресурс” компанийн консорциум,
• “Пиибоди энержи” корпораци

Харин дараах компаниуд Засгийн газрын тогтоолд заасны дагуу хөрөнгө оруулах бус нүүрсний олборлолт, борлуулалтын чиглэлд хамтран ажиллах саналаа ирүүлжээ.

• “Иточу”
• “Сожиц”- ын консорциум,
• “Мицуй”
• “Тавантолгой”

Засгийн газар наймдугаар сард 268 дугаар тогтоол гаргаж, Тавантолгойн ордод хөрөнгө оруулж, хамтран ажиллах аж ахуйн нэгжийг шалгаруулахаар болсон.

Хөрөнгө оруулагч нь “Эрдэнэс Тавантолгой” компанийн менежмент болон өр төлбөрийг хариуцах, 2.5 жилд Тавантолгойн бүсэд 30 сая тонн хүртэлх нүүрс баяжуулах үйлдвэрийн хүчин чадал бий болгох, Тавантолгой-Гашуунсухайт чиглэлийн төмөр замыг өөрийн хөрөнгөөр барих, хоёрдогч улсад коксжих нүүрс борлуулах үүрэг хүлээнэ.

Тогтоолд хөрөнгө оруулагчийн 51 хувийг нь нүүрсний салбарт таван жил ажилласан, хувьцааны хяналтын багцыг Монгол Улсын иргэн эзэмшдэг компани байна гэж заасан.

Энэхүү шаардлагыг “Энержи ресурс” компани л хангаж байгаа аж.