Зургадугаар сарын 15-наас наймдугаар сарын 15-н хүртэл тэгш, сондгой дугаарын хязгаарлалт хийх байсныг түр хойшлууллаа.

Зам засварын ажилтай холбогдуулан "Түгжрэлийн үер" болно гэж бодсон ч харьцангуй онцгой нөхцөл байдал үүсэхээргүй байгаа тул ийнхүү шийдвэрлэж болох юм гэдгийг нийслэлийн Засаг дарга Э.Бат-Үүл хэллээ.

Нийслэлийн Удирдлагын зөвлөлийн өнөөдрийн хуралдаанаар дулааны шугам солих ажлын хүрээнд өнгөрсөн хугацаанд замын ачаалал ямар байсныг танилцуулж улмаар дээрх шийдэлд хүрсэн юм.

Зам засварын үеийн хөдөлгөөний ачааллын талаарх мэдээллийг Нийслэлийн Засаг даргын Зам тээвэр, дэд бүтцийн орлогч Н.Гантөмөр "Төв шуудангийн уулзвараас Цэцэг төвийн уулзвар хүртэлх шугам сүлжээний өргөлтийн ажил хийгдэж байгаатай холбоотой замын хөдөлгөөний ачаалал 6-р сарын 8-10-ны хооронд Чингисийн өргөн чөлөө урдаасаа хойшоо, Сүхбаатарын гудамж урдаасаа хойшоо, Жуулчны гудамж зүүнээсээ, Сөүлийн гудамж 1-р сургуулийн урдуур 2 талдаа, Нарантуулын уулзвар хойноосоо ачаалал ихтэй байсан, бусад авто замуудын хөдөлгөөн хэвийн, Энхтайваны өргөн чөлөө, Баруун 4 замаас Зүүн 4 замын хоорондох замын хөдөлгөөний ачаалал засварын ажлын өмнөх үеэс бага байсан" хэмээн танилцуулсан юм.

Энэ сарын 7-ноос эхэлсэн зам засварын ажил сургууль амарсан, мэдээлэл өгсөнтэй холбоотойгоор тооцоолж байснаас харьцангуй бага ачаалал өгсөн учраас ийнхүү хотын төвийн зарим хэсэгт улсын дугаарын тэгш, сондгойгоор хязгаарлан хөдөлгөөнд оролцуулах байсныг тодорхойгүй хугацаагаар хойшлууллаа.

Харин төрийн байгууллагын ажлын цагийг эргэн өөрчлөх талаар ирэх 7 хоногт хэлэлцэхээр боллоо. Зам засвараас үүдэн гарах ачааллыг багасгах нэг арга гэж нийслэлээс үзэж байна. 08.00 цагаас эхэлдэг байсан ажлын цагийг сургууль, цэцэрлэгийн ажиллах цагтай уялдуулан хойшлуулсан бөгөөд сургууль, цэцэрлэг амарсан энэ үед дахин өөрчлөх нь зам засварын үеийн хөдөлгөөний ачааллыг бууруулах ач холбогдолтой гэж үзэж байна.