Агаарын бохирдлыг бууруулахын тулд юун түрүүнд нүүрсний хэрэглээг багасгах, нүүрсийг орлох сайжруулсан түлшний үйлдвэрүүдийг дэмжих чиглэлээр Засгийн газар ажиллаж байна. Сайжруулсан түлш үйлдвэрлэгч 10-аад аж ахуйн нэгж байгаа талаар НЗДТГ мэдээлсэн. Тухайлбал, "Мон ватт" компани Герман технологи нэвтрүүлж хоёр жилийн хугацаанд туршилт хийж байна.

Шөнийн хямд өртөгтэй цахилгаан эрчим хүчийг хуримтлуулж, өдөр нь 16 цагийн турш дулаанаа ялгаруулах энэхүү технологийг Монголд нутагшуулаад байгаа юм. Үүнээс гадна Засгийн газар шөнийн цахилгааны хэрэглээг дэмжих зорилгоор тарифыг нь 50 хувь хямдруулахаар болсон. Нийслэлийн 2017 оны төсөвт агаарын бохирдлыг бууруулах чиглэлд 3.2 тэрбум төгрөг баталсан.

Мөн Агаарын бохирдлыг бууруулах үндэсний хороо таван тэрбум төгрөг төсөвлөжээ. Үүний 3.5 тэрбум төгрөгийг шөнийн цахилгааны хөнгөлөлтөд мөн 450 сая төгрөгийг сайжруулсан зууханд, 400 саяыг сайжруулсан түлшинд зарцуулахаар төлөвлөж байгаа талаар БОАЖЯ мэдээлсэн юм. Эдгээрээс гадна Дэлхийн банкны "Цэвэр агаар" төслийн хүрээнд 7.8 тэрбум төгрөгийн хөрөнгө оруулалт хийх аж.

Үүнээс гадна утаа ихтэй бүсийн 51 сургуулийн 40 мянга орчим сурагчид амны хаалт тарааж өгсөн. "Эрбум"компанийн үйлдвэрлэсэн энэхүү амны хаалт нь агаарын бохирдлыг 99 хувь шүүнэ гэдгийг тус компанийн захирал онцолсон байна. Мөн гэр хорооллын бүсийн 2-5 насны 7500 орчим хүүхэдтэй нийт 50 цэцэрлэгт 200 ширхэг агаар цэвэршүүлэгч төхөөрөмж нийлүүлсэн. Үүнийг Дэлхийн банкны санхүүжилтээр хэрэгжүүлж байгаа "Улаанбаатар-Цэвэр агаар" төслөөс хэрэгжүүлсэн. Нийслэлийн агаарын бохирдлын хэмжээ ДЭМБ-ын тогтооосон хэмжээнээс долоо дахин их байгааг НҮБ-ын Хүүхдийн сангийн тайланд онцолжээ.

Т.Элиса