Мод, модон материалын "Хангай", "Цайз", "Доной", "Цолмонбадрах" зэрэг захууд болон тэнд үйл ажиллагаа явуулж байгаа түрээслэгч нарын зарж борлуулж байгаа зүсмэл мод, модон материалд шалгалт хийжээ. Уг шалгалтыг Цагдаагийн байгууллагаас зохион явуулж байгаа "Цохилт" нэгдсэн арга хэмжээний хүрээнд хийсэн аж.

Шалгалтад "Цайз" захын найм, "Цолмонбадрах"-ын 17, "Доной" захын 19, "Хангай" захын 20 нийт 64 түрээслэгч хамрагджээ. Захуудад гарч байгаа нийтлэг зөрчил нь худалдаалагдаж байгаа мод, модон материал нь дагалдах эрхийн бичиггүй, гоожин, гарал үүслийн гэрчилгээ дутуу. Мөн зүсмэл материалууд нь стандартын шаардлага хангаагүй байсан юм. Үүний дээр түрээслэгч нар буруу замаар орж ирсэн ямар нэгэн бичиг баримтгүй, өөрөөр хэлбэл, хулгайн модыг хямд үнээр худалдан авч борлуулдаг нь тогтоогджээ. Тухайлбал, Сонгинохайрхан дүүргийн XXII хороо Хилчний 32 тоотод оршин суух И.Эрдэнэхүү банз хатаалгын цех ажиллуулах нэрээр хашаандаа хууль бусаар 45 тэвш буюу 450 шоо метр хатаасан банзыг ямар нэгэн зөвшөөрлийн бичиггүйгээр хураасан байсныг илрүүлсэн байна. Мөн Баянзүрх дүүргийн XIX хороо "Жонотон" ХХК-ийн хашаанд хоёр метрийн урттай бөөрөнхий мод найман тэвш буюу 80 шоо метр, зэргэлдээ хашаанд "Цайз" захын түрээслэгч н.Оюунчимэг замтай хөрөө нэг, дугуй хөрөө хоёр, цахилгаан өргөгч нэг ширхэгийг хууль бусаар ажиллуулж байсныг илрүүлжээ. Үүний дээр 2.5 см-ийн банз 48 шоо метр, 185 боодол брусс, зах банз 10 шоо метр, шуудайлсан түлээ 130 шуудай, хоёр см-ийн банз 11.5 шоо метр байсныг хураан авч лацдадсан байна.

Түүнчлэн тус дүүргийн XIX хороо "Цайз"-ын 19 А-612 тоотод байрлах н.Бурмаагийн хашаанд "Доной" захын түрээслэгч н.Батсүх зохих зөвшөөрөлгүйгээр 104 шоо метр палк мод бэлтгэсэн байсан нь илэрчээ. Тус дүүргийн XXII хорооны зүүн Алтан-Өлгийн 2-18 тоотод Ц.Эрдэнэсүх ямар нэгэн бичиг баримтгүйгээр брүсс 4.4 шоо метр, хоёрын банз 31.3, дөрөв см-ийн банз 5.6, зах банз 3.36 шоо метр бэлтгэж хураасан байжээ.

Баянзүрх дүүргийн XXII хороо "Шагайн огтайтэр" ХХК-ийн хашаанд шалгалт хийхэд бутлагч есөн машинтай самар хагас боловсруулах үйлдвэр ажиллаж байсныг илрүүлжээ. Уг үйлдвэрийн бүх тоног төхөөрөмж, түүхий эдийг баримтжуулан тус үйлдвэрт ажиллаж байсан Хятадын хоёр иргэний хамт дүүргийн цагдаагийн хэлтэст шалгуулахаар шилжүүлсэн байна.

Ийнхүү арга хэмжээний хүрээнд 107 ширхэг нойтон нарс модыг улсын орлого болгон хурааж, 1.2 сая төгрөгийн торгуулийн арга хэмжээ авчээ. Мөн 62 иргэний тээвэрлэж явсан 428 шоо метр модны холбогдох бичиг баримтыг шалгаж, зөрчилтэй 380 шоо метр модыг улсын орлого болгов.

Л.Нинж