Дэлхийн хамгийн их хүнтэй улс болох Энэтхэгт хүн амын тооллого өнөөдрөөс эхлэн нэг жилийн хугацаанд үргэлжлэх гэж байна.  

Энэ нь сүүлийн 15 гаруй жилийн хугацаанд хийж буй анхны томоохон тооллого болох гэж байна. Уг тооллогыг 2021 онд хийх хуваарьтай байсан ч цар тахлын улмаас хойшилсон. 

Энэтхэг даяар гурван сая гаруй албан хаагч хүн амын тооллогыг хийж гүйцэтгэх бөгөөд тооллого хоёр үе шаттай явагдана. 

Эхний шат буюу орон сууц, өрхийн тооллогоор амьдрах нөхцөл, хэрэглээ, өмч хөрөнгийн талаарх мэдээлэл цуглуулна.

Харин хоёр дахь шат нь 2027 оны хоёрдугаар сард эхэлж, хүн ам зүй, боловсрол, шилжилт хөдөлгөөн, төрөлтийн талаарх дэлгэрэнгүй мэдээлэл авах аж.

Тус улсын 16 дахь удаагийн хүн амын тооллого нь энэ удаа кастын мэдээллийг багтаах бөгөөд бодлого боловсруулах, халамжийн үйлчилгээ хүргэх, улс төрийн төлөөллийг тодорхойлоход чухал ач холбогдолтойд тооцогдож байна.

Түүнчлэн анх удаа дижитал хэлбэрээр буюу гар утасны аппликэйшн ашиглан мэдээлэл цуглуулж буйгаа онцлог.

НҮБ-ын Хүн амын сангийн мэдээлснээр 1.4 тэрбум гаруй хүн амтай Энэтхэг улс 2023 онд БНХАУ-ыг давж, дэлхийн хамгийн олон хүнтэй улс болсон юм.

Эх сурвалж: ВВС