Хил хамгаалах ерөний газраас өнөөдөр /2026.03.28/ мэдээлэл хийлээ. Өмнөговь аймаг дахь Хилийн цэргийн 0131-р ангийн дугаар салбарт хугацаат цэргийн алба хаагч мотоциклтой малд яваад сураггүй болжээ. 

ХХЕГ-ын Хэвлэлийн төлөөлөгч, Дэд хурандаа У.Пүрэвсүрэн, 2025 оны нэгдүгээр ээлжээр Өвөрхангай аймгийн Уянга сумаас татагдан ирсэн хугацаат цэргийн алба хаагч С нь 2026 оны 3-р сарын 25-ны өдрийн 12.00 цагт үүрэг гүйцэтгэж байсан малын сууриасаа 6-8 км-ийн цаана бэлчээрт байсан тэмээн сүргийг эргүүлж ирэх зорилгоор албаны мотоциклтой гараад сураггүй болсон.

Энэхүү цэргийн алба хаагч явснаасаа хойш тодорхой хугацаанд харилцаа холбоо тасарсан тул малын суурийн ахлагч араас нь явсан боловч олоогүй. Салбарт мэдэгдсэн. Салбараас эрлийн бүлэг гарсан боловч үр дүн гараагүй. Ингээд анги болон Хил хамгаалах ерөнхий газарт мэдэгдсэнээр эрлийн бүлэг улам өргөжиж, 72 дахь цагтаа эрэл үргэлжилж байна.

Эрлийг тус аймгийн Цагдаа, Онцгой байдлын газар болон Баян-Овоо, Номгон сумын ЗДТГ, Хил хамгаалах туслах хүчний гишүүдийн оролцоотой 17 бүлгийн 82 хүн, 12 автомашин, 17 мотоцикл, 6 дрон ашиглан зохион байгуулж байна. 

Мөн агаараас эрэн хайх зорилгоор ХХЕГ-аас нисэх онгоцтойгоор үүрэг гүйцэтгэж байна. Энэхүү эрлийн газар нь хад асга, бартаа саад ихтэй, жалга дов сондуултай, заган ойтой учир эрлийг явуулахад хүндрэлтэй байна.

Эрлийн үйл ажиллагаанд тухайн хугацаат цэргийн алба хаагчийн ар гэр, сум орон нутгийнхан сайн дураараа оролцож байгаад хилчид бид бүхэн талархаж байна.

Тухайн цэрэг нь алба хаах хугацаандаа сахилгын болон ёс зүйн зөрчил гаргаж байгаагүй, нэг сарын дараа халагдах юм. Эрлийн талаарх мэдээллийг олон нийтэд шуурхай хүргэж ажиллах болно гэв.