УИХ-ын Өргөдлийн байнгын хорооны хуралд дахин төлөвлөлтөд газар нь орсон болон орон сууц захиалж хохирсон иргэд, барилгын компаниудын төлөөлөл оролцож байна.

Грийн ресурс ХХК-ийн Баянгол дүүрэгт хэрэгжүүлж буй “Хөх сувд” хотхон төсөлд захиалга өгөөд байрандаа ороогүй иргэдийн төлөөлөл иржээ. Тус компанийг төлөөлж гурван хүн хуралд ирсэн байна.

Иргэн Баярмаа, Би Баянгол дүүргийн Х хороонд 2021 онд захиалга өгсөн ч өнөөг хүртэл орон сууцандаа орж чадаагүй. Барилгын ажил сүүлийн 1.8 жилд огт явагдаагүй.

Бидэнтэй адил газрын эздийн асуудал яригддаг. 2013 онд газраа чөлөөлөөд 12 жилд мөн байрандаа орж чадаагүй байна. бид төсөл хэрэгжүүлэгч “Грийн ресурс” компанийн төлөөлөлтэй хэд хэдэн удаа уулзалт хийсэн ч ямар нэг шийдвэрт хүрээгүй. 2026 оны 4-р сараас барилгын талбайд гэр бариад тайван жагсаад хийж байна.

2022 онд хийсэн гэрээг 2026 оны 5 сард шинэчилсэн. Шинэчлэхдээ олон заалтыг хассан байна. Жишээлбэл, Татварын хууль зөрчсөн гэрээг бидэнд санал болгосон. НӨАТ-ын баримт олгоно гэсэн заалтыг хассан байна. Энэ төсөл ямар шатанд, хэний буруугаас болж гацсаныг төрийн байгууллага шалгаж өгөөч гэж хүсэж байна. 

Иргэн Сонинтуяа, Манайх Сүхбаатар дүүргийн IX хороонд баригдаж буй “Басмаа” компанд 2015 онд байр захиалсан. Уг газрыг 2013 онд чөлөөлж, 2015 оноос захиалга авч эхэлсэн. 2015 оноос хойш 11 жил 132 айлын энэ орон сууц ашиглалтад ороогүй.

Үүнээс болж 200 гаруй иргэн сэтгэл санаа, мөнгө төгрөг, эрүүл мэнд, амьдрал, амь насаараа хохирсон. Дахин төлөвлөлтөд орсон гэж газар чөлөөлөөд, хяналт тавьж чадаагүйгээс иргэд хохирч байна. Хууль хяналтын байгууллагад гомдол гаргаад явахад бид нар нэмж цаг зав, санхүүгийн мөнгөөр хохирдог.

Орон сууцны гүйцэтгэл 30-70 хувьд хүрвэл Улсын бүртгэлийн ерөнхий газарт үл хөдлөх хөрөнгө бүртгэдэг юм билээ. Гэтэл ямар үндэслэлээр бүртгүүлдгийг маш их гайхаж байна. Барилга, хот байгуулалтын яам компаниудад ямар үндэслэлээр барилга барих зөвшөөрөл өгдөг юм бэ. Төрийн байгууллагуудын хариуцлагагүй байдлаас иргэд олноор хохирч байна гэв.