УИХ-ын чуулганы ирэх долоо хоногийн хуралдаанаар Сургуулийн орчны эрүүл мэнд, аюулгүй байдлын тухай хуулийг хэлэлцэх болохыг УИХ-ын дарга Н.Учрал хэллээ. 

Хуулийн төслийг УИХ-ын гишүүн Т.Мөнхсайхан, М.Мандхай, Л.Энх-Амгалан нар санаачилсан бөгөөд сургуулийн орчинд суралцагчийн эрүүл мэндийг хамгаалах, дэмжих, эрүүл аюулгүй, орчинд сурч боловсрох нөхцөлийг бүрдүүлэх, эрүүл зан үйлийг төлөвшүүлэх, аливаа өвчин эмгэгээс урьдчилан сэргийлэхэд чиглэсэн үйл ажиллагааг зохион байгуулах, хэрэгжилтэд хяналт тавихтай холбогдсон харилцааг зохицуулах юм байна. 

Хуулийн төсөлд дараах асуудлыг зохицуулахаар тусгана. Үүнд: 

1. Төрөөс суралцагчийн эрүүл мэндийг хамгаалах, дэмжих дунд хугацааны төлөвлөгөө батлах бөгөөд түүний хэрэгжилтийг жил бүр тайлагнах тогтолцоог бүрдүүлэх талаар тусгана. 
2. Сургуулийн орчинд суралцагчийн эрүүл мэндийн тусламж, үйлчилгээ авах, жил бүр хүний эрхэд суурилсан, холбогдох стандарт хангасан болон суралцагчийн хувийн мэдээлэл алдагдахаас сэргийлсэн орчинд үзлэг, шинжилгээ явуулах, түүний үр дүнд нийцсэн хариу арга хэмжээг тухайн сургуульд зохион байгуулах зохицуулалтыг тусгана. 
3. Сургуулийн орчинд халдварт болон халдварт бус өвчлөлөөс урьдчилан сэргийлэх, суралцагчдын эрүүл мэндийн боловсролыг дэмжихтэй холбогдох зохицуулалтыг тусгана. 
4. Төрөөс сургуулийн орчны аюулгүй байдлыг хангах дунд хугацааны төлөвлөгөө батлах бөгөөд түүний хэрэгжилтийг жил бүр тайлагнах тогтолцоог бүрдүүлэх талаар тусгана. 
5. 5. Суралцагчдад сургуулийн орчны аюулгүй байдлын боловсрол олгох, гамшгаас урьдчилан сэргийлэх, даван гарах чадвар эзэмшүүлэх зохицуулалт тусгана. 
6. 6. Сургуулийн барилга, байгууламж, түүний орчинд тавигдах нэмэлт шаардлагыг тусгана. 
7. 7. Сургуулийн барилга, байгууламж, биеийн тамирын талбай, сургуулийн эзэмшил газарт аливаа аюулгүй байдалд холбогдох стандартыг бүрэн хангаагүйн улмаас бусдын эрүүл мэнд, хөрөнгө, амь насанд учирсан хохирлыг нөхөн төлүүлэх, хариуцлага хүлээхтэй холбогдох эрх зүйн зохицуулалтыг тусгана. 
8. Тус хуулийг хэрэгжүүлэхтэй холбогдох санхүүгийн олон талт эх үүсвэрийн талаарх зохицуулалт тусгана гэжээ. 

Хуулийн төсөлтэй ЭНД дарж танилцах боломжтой.