Ерөнхий сайд Н.Учрал ОБЕГ-ын дарга,  хошууч генерал Г.Ариунбуян, Татварын ерөнхий газрын дарга Б.Цогтнарантай уулзав. 

УИХ Зөвшөөрлийн тухай хуулийг баталсан. Энэ хуульд 381 үйл ажиллагааг эрхлэхдээ зөвшөөрөл авахгүй гэжээ.     

Өнгөрсөн лхагва гарагт 146 төрлийн бизнест төр өөрөө очиж үйлчилнэ буюу бизнес эрхлэгчид мэдэгдээд ажлаа эхлэх шийдвэрийг Засгийн газрын хуралдаанаас гаргасан. Гэвч яамд, агентлагууд, орон нутгийн удирдлага бие даасан шийдвэр гаргасаар байна. Тусдаа журам гаргаж, мэдэгдэл, лиценз, эрх олгосоор байгааг Ерөнхий сайд Н.Учрал онцлов.

Тэрээр, "Иргэн мэдэгдсэн бол бизнесээ шууд эхэлсэн иргэндээ очиж үйлчлэн, галын дүгнэлт гаргахдаа дахин бичиг баримт нэхэх ёсгүй. Цахим системд нэгэнт байгаа улсын бүртгэл, газар, кадастр, комиссын дүгнэлт гэх мэтийг цаасаар шаардахгүй.Барилга нь галын дүгнэлттэй байхад доторх түрээслэгчээс давхар нэхэхгүй.

Шадар сайдын 2023 оны шийдвэрийг эргэж харна, галын дүгнэлтийг цэгцэлж цахим болгоно. Татварын байгууллага бизнес эрхлэгчийг дарамталж дээрэлхэх биш зөвлөж тусал. Татварын өртэй байсан ч зөвшөөрөл олгоно, сунгана" гэв.