"Хос залуус гэдэг аз жаргалтай
Хоёулаа бүхнээс дутахгүй хайрт минь" гэж дуулан ерээд оны залуусыг байлдан дагуулж байсан "Харш" хамтлагийнхан хаана юу хийж явааг үнэнч фэнүүд нь сонирхох нь бий. Тэгвэл тун удахгүй тус хамтлаг хорин жилийнхээ ойн тоглолтыг бүрэн бүрэлдэхүүнээрээ хийж дахин тайзнаа гарах нь.

-Анх "Харш" хамтлаг хэдэн онд байгуулагдаж байв, хамтлаг яагаад тарах болов?
-Манай хамтлаг анх далаад оны сүүл наяад оны эхээр гарч ирж байсан. "Одод" хамтлагийг үүсгэн байгуулагч нь Зуундарь. Тэр хүний үүсгэн байгуулсан "Одод" хамтлагийн бүрэлдэхүүнийг би сүүлд "Харш" хамтлаг болгосон юм. Хамтлаг маань тарсан хэдий ч хорин жилийн ой болох гэж байгаа болохоор бид бүрэн бүрэлдэхүүнээрээ тоглох бодолтой байгаа. Хорин жилийнхээ ойг өнгөрсөн жил хийх байсан боловч хамтлагийн гадаадад амьдардаг гишүүн маань ирж амжсангүй. Мөн нэг маань бурхан болсон. Ийм болохоор тоглолт түр хугацаагаар хойшлоод байгаа. Гэхдээ манай хамтлагийн зарим нэг гишүүд бие даасан тоглолтоо хийсэн. Тухайлбал Баасандорж "Тайзан дээр өнгөрүүлсэн 25 жил", миний "Аялгуу" зэрэг тоглолтууд сайхан болж өнгөрсөн. Харин удахгүй "Харш" хамтлаг долоон хүний бүрэлдэхүүнтэй тоглолтоо хийх болно. Нэг гишүүн дутуу байна гэж бодож байж магадгүй сая би хэлсэн, нэг маань бурхан болсон. "Харш" хамтлаг анх байгуулагдаж байхад зах зээл дөнгөж эхэлж байлаа. Зах зээлийн үед хүмүүсийн амьдрал ямар байлаа, үнэхээр хүнд байсан шүү дээ. Манай хамтлагийн гишүүд ч тус тусынхаа мөрийг хөөхөөс өөр арга байгаагүй. Гэхдээ цаг үе хэцүү болоод бид тарсан гэх боловч уран бүтээл хийсээр байсан. Энэ нь ардчиллыг муулж байгаа юм биш шүү. Бидний анхны уран бүтээл "Энэ цэцгийн дэлбээг энхрийлж хайрлаж яваарай" гэх үгтэй "Шар цэцэг" гэдэг дуу байсныг хүмүүс санаж байгаа байх. Би хөгжмөө орхиж чадалгүй хичээл ном зааж явсан гэх үү дээ. Миний шавь нараас дуучин болсон хүн ч байна, дуулаачаар сурч байгаа оюутнууд ч бий. Би өөрийнхөө чадах чинээгээр зааж өгөх биш би өөрөө ч дахин сурах хэрэгтэйгээ мэдсэн. Би өөрийгөө их чамладаг юм. Одоо харахад бас л дутуу санагдаж байна.

-Уран бүтээл, ажлын хувьд тийм байж. Харин хувийн амьдралдаа та хэр сэтгэл хангалуун явдаг вэ?
-Би бүр бага байхаасаа л хөгжим тоглох сонирхолтой байсан. Миний ээж нөлөөлсөн байх гэж боддог юм. Ээж маань гавьяат жүжигчин урлагийн хүн л дээ.. Энэ нь миний урлагт хөл тавих замыг нээж өгсөн. Нуух юм юу л байхав. Эхнэр хүүтэйгээ амьдардаг. Эхнэр гэр зуураа, хүү оюутан. Би ганц хүүтэй. Хүү минь энэ жил хорин нэг хүрч байна. Миний хүү урлагийн хүн болохгүй, хуульч болно гэдэг. Тэр чиглэлээрээ сурдаг. Одооны хүүхдүүдийн сэтгэхүй их өөр болж дээ. Би уг нь хүүгээ урлагийн хүн болгож өв залгамжилсан дуучин бол гэж хэлж байсан удаа бий. Гэтэл хүү минь ингэж хэлж байгаа юм даа. "Ааваа би урлагийн хүн болохгүй ээ. Та өөрийнхөө амьдралыг хар даа, би тань шиг амьдралаар амьдрахгүй. Би өөрийнхөөрөө амьдармаар байна" гэж. Тэгээд л зөрөөд хууль зүйн чиглэлийг сонгосон. Одоо ч надад дуу хамтарч хийх санал зөндөө ирж байгаа. Тэр болгоныг яривал их цаг орно. Сүүлийн үед нэг эмэгтэй дуучин хамтран дуэт дуулъя гэсэн санал тавиад байгаа.

-Нууц биш бол хэн гэдэг дуучин бэ?
-Энэ хүнийг одоохондоо нууц хэвээр нь үлдээе дээ. Цаг нь болохоор л үзэгч сонсогчид мэдсэн нь дээр байх.