НӨАТ-ын тухай хуулийн шинэчилсэн найруулгыг бид долоо хоногийн дараа мөрдөж эхэлнэ.

Энэ хуульд “… албан татвар суутган төлөгч нь

• Албан татвар төлөгчийн хийсэн төлбөр тооцооны мэдээллийг хэрэглэгчийн системд төлбөр хийсэн тухай бүр бүртгэх,
• Бараа, ажил, үйлчилгээг борлуулсан тухай бүр төлбөрийн баримтыг татвар төлөгчид олгох,
• Хэрэглэгчийн системд бүртгэгдсэн төлбөрийн баримтын мэдээллийг гурав хоногийн дотор багтаан борлуулалтын нэгдсэн системд илгээх” үүрэгтэй.   

Иймд төлбөрийн баримт хэвлэх хялбаршуулсан программыг бараа, ажил, үйлчилгээний онцлог тус бүрт тохируулан бэлэн болгожээ. ААН-үүд энэ программыг кассын машиндаа суулгах ёстой. Мөн ebarimt.mn цахим хуудсанд нэвтрэн, өөрт тохирох хувилбарыг ашиглах боломжтой юм байна.

НӨАТ-ын тухай хууль ирэх оны эхний өдрөөс хэрэгжинэ. Иймд иргэд 1000 төгрөг юм чинь гэж нэрэлхэлгүй, цааргалахгүйгээр БАРИМТ бүрээ ЗААВАЛ авч дадахыг ТЕГ-аас сануулав. Учир нь тэр баримт сар бүр болох сугалаанд хонжвор хожих баталгаа болох юм. Нэгдүгээр сард цугларах баримтуудад үндэслэн хамгийн эхний сугалааг хоёрдугаар сард зохион байгуулна. Ингэхдээ иргэд хэдий чинээ их хэмжээний борлуулалт хийн, нэгдсэн системд бүртгүүлнэ төдий чинээгээр сугалааны тохирол өсөх аж.

Тэгэхээр нэгдүгээр сарын 1-нээс эхлэн иргэн та худалдан авалт бүртээ татварын нэгдсэн системээс баталгаажсан, сугалааны дугаар бүхий баримт авах ёстой. Хэрэв таны үйлчлүүлсэн ААН баримт олгохгүй бол 1800-1288 дугаарын утсанд мэдэгдэж болох юм байна. Баримт өгөөгүй байгууллагыг борлуулалтын орлогынх нь 2 хувиар торгох, давтан зөрчил үйлдвэл хоёр хувийг нэмэх зэрэг арга хэмжээ авна гэж НӨАТ-ын төслийн нэгжийн захирал Р.Отгонтулга танилцууллаа.