Эдийн засгийн сэтгүүлчдийн “Өөрчлөгч” клубээс санаачлан, “Таван хувийн зээлийн хүү зөв нүүдэл мөн үү” сэдэвт хэлэлцүүлгийг өнөөдөр зохион байгууллаа. Хэлэлцүүлэгт УИХ-ын даргын Ипотек, барилгын салбар хариуцсан орон тооны бус зөвлөх Г.Байгалмаа, МУИС-ийн Эдийн засгийн сургуулийн багш Б.Алтанцэцэг, Стратегийн үндэсний хүрээлэнгийн захирал Б.Мөнхсоёл, Монголын банкны холбооны гүйцэтгэх захирал Ж.Үнэнбат нар оролцсон юм.

Хэлэлцүүлгийн эхэнд Г.Байгалмаа зөвлөх барилгын салбарын өнөөгийн байдал, сүүлийн жилүүдэд энэ салбар, тэр дундаа барилгын материал үйлдвэрлэл хэрхэн хөгжсөн, найман хувийн хүүтэй зээл олгож эхэлснээр ямар эерэг үр дагаврууд авчирсан, зээлийн хүүг 5 хувь болгон бууруулснаар хэдий хэмжээний орлоготой өрх зээлд хамрагдах боломжтой талаар танилцуулав.

Дараа нь эдийн засагч Б.Алтанцэцэг эдийн засгийн нөхцөл байдал одоо ямар байгааг тоо баримтаар дэлгэрэнгүй танилцуулав.

МУИС-ийн багш Б.Алтанцэцэгийн үзэж байгаагаар энэ бүх тоон үзүүлэлтүүд сөрөг төлөвтэй байгаа бөгөөд ойрын ирээдүйд ажилгүйдэл буурч, иргэдийн орлого нэмэгдэх гэх мэт хандлага ажиглагдахгүй байна. Худалдан авах чадвар буурсаар байгаа тул 5 хувийн хүүтэй орон сууцыг худалдаж авах чадвартай өрх маш цөөн гэсэн юм. Мөн тэрээр 5 хувийн хүүг санал болгож буй эрх баригчид юуны өмнө дараах асуултуудад бүрэн хариулт өгсний дараа л бодлогын өөрчлөлт хийх ёстойг анхааруулав.

• 5 хувийн хүүтэй зээлийг хэнд зориулсан хөтөлбөр вэ?
• Энэ хөтөлбөр ямар хугацаанд хэрэгжих вэ?
• Хэдэн төгрөгийн төсөвтэй вэ?
• Хэрхэн санхүүжүүлэх вэ?
• Төсөв, мөнгөний бодлого?
  • Өрийн дарамт
  • Ханш
• Санхүүгийн зах зээл улмаар эдийн засгийн эрсдэл
• Эргэн төлөлт

Харин зөвлөх Г.Байгалмаа 5 хувийн хүүтэй зээл олгох нь дан ганц барилгын салбарыг дэмжээд байгаа юм биш, энэ бол бүх салбарт хамаатай асуудал гэв.