Сүүлийн зургаан жилд Эрүүгийн хуулийн 181 дүгээр зүйлд заасан танхайрах 3548 гэмт хэрэгт 5148 хүн ял шийтгүүлжээ. Шүүхээс тэдгээрийн 5002-т нь хорих ял, үлдсэн хэсэгт нь бусад төрлийн ялыг оноосон аж. Энэ төрлийн гэмт хэрэг үйлдэгчдийн олонх нь буюу 53.3 хувь нь согтуугаар гэмт хэрэг үйлдсэн байна.

Ял шийтгүүлэгчдийн 185 нь буюу 3.5 хувь нь эмэгтэйчүүд, 281 нь буюу 5.5 хувь нь хүүхдүүд байна. Насны хувьд авч үзвэл энэ төрлийн гэмт хэрэгт ял шийтгүүлж буй иргэдийн 3034 нь буюу 58.9 хувь нь 18-30 насныхан байгаа аж. Танхайрагчдын боловсролын тухайд 3462 нь буюу 67.2 хувь нь бүрэн дунд боловсролтой байна. Харин энэ гэмт хэрэгт ял шийтгүүлэгчдийн 12.1 хувь нь оюутан, сурагчид байгаа аж.

Мөн ийм төрлийн гэмт хэрэгт ял шийтгүүлсэн хүмүүсийн 62.8 хувь нь эрхэлсэн ажил, сургуульгүй хүмүүс байна.

Энэ оны эхний гурван улирлын байдлаар шүүхээр шийдвэрлэгдсэн гэмт хэрэг буурсан хэдий ч танхайрах гэмт хэрэг 13.4 хувиар өссөн үзүүлэлт гарчээ.

Б.Тэлмэн