“Эрдэнэс Монгол” нэгдлийн Гүйцэтгэх захирал Б.Даваадалай БНХАУ-ын “Sinosure” корпорацын Шаньси муж дахь салбарын Дэд Ерөнхийлөгч Чэн Ган тэргүүтэй төлөөлөгчдийг хүлээн авч уулзлаа.

Уулзалтаар Багануурын уурхайг түшиглэн хэрэгжүүлэх нүүрс-пиролизын үйлдвэр барих төслийн явц, хамтын ажиллагаа болон санхүүжилтийн боломжийн талаар санал солилцов. Уг төсөл нь:

▪️ Хүрэн нүүрсийг гүн боловсруулж “хөх нүүрс” буюу хагас кокс үйлдвэрлэнэ
▪️ Улаанбаатар хотын агаарын бохирдлыг бууруулахад бодит хувь нэмэр оруулна
▪️ Түүхий нүүрсний хэрэглээг орлох шинэ шийдэл болно
▪️ Нүүрс-химийн боловсруулах үйлдвэрлэлийн шинэ суурийг тавина
▪️ Уул уурхайгаас нэмүү өртөг шингэсэн үйлдвэрлэл рүү шилжих стратегийн чухал алхам болно

Төслийн хүрээнд олон улсын лабораторид туршилтын бүтээгдэхүүнд шинжилгээ хийж байна. Ойрын хугацаанд EPC гүйцэтгэгчийн сонгон шалгаруулалтыг зарлаж, барилга угсралтыг эхлүүлэхээр төлөвлөжээ.

“Sinosure” корпорац төслийн санхүүжилтийн эрсдэлийг бууруулах, экспортын зээлийн даатгалын чиглэлээр хамтран ажиллах сонирхлоо илэрхийлсэн байна. 

Нийслэлчүүдийн өвлийн хэрэглээг хангахын тулд сайжруулсан түлш хэрэглэдэг. Өнгөрсөн өвөл БНХАУ-аас энэ түлшний түүхий эдийг импортолсон. Бид маш их нүүрсний нөөцтэй атлаа гадаадаас авч, тээврийн зардал гаргалаа гэсэн шүүмжлэл их өрнөсөн. Иймд "Багануур" ХК-ийн уурхайд түшиглэн пиролизын үйлдвэр байгуулснаар импортын бүтээгдэхүүнийг орлоно гэж "Эрдэнэс Монгол" нэгдэл үзэж байна.